Biz elektr energiyasın qáwipsiz jaǵdayda mólsheri menen jetkerip beretuǵın transformatorlardı tek ǵana úlken zavodlarda islep shıǵaradı dep oylaytuǵın edik. Al, bul úskeneni Xojeli rayonında jasawshı Aziz Tajibaevtıń ózi basshılıq etip atırǵan “ISAKO-ENERGO-KOMPLEKT” JShJ da islep shıǵarıp atırǵanlıǵın esitkenimizde jaslarımız arasında óndiriste jeke isbilermenliktiń rawajalanıp atırǵanlıǵınıń jáne bir márte gúwası boldıq.

Ol Prezidentimiz tárepinen jaslarǵa jaratıp berilip atırǵan imkaniyatlardan orınlı paydalanıp, 360 mln sum kredit alıp cextı ashıp hám ol jerde jumıssız jaslardıń bántligin támiyinlewge erisedi. Yaǵnıy basında bir jumısshı menen jumıs baslaǵan bolsa házirgi waqıtta jumısshılar sanı beske jetti. Tutınıwshılardıń buyırtpaları boyınsha tez hám sapalı túrde hár túrli quwatlıqtaǵı tranformator punktlerin jıynap, respublika boyınsha jetkeriw hám tiyisli qánigeler menen birgelikte qurıp beriw xızmetleri tolıq jolǵa qoyılǵan.
Azizdiń bul tarawǵa qızıǵıwshılıǵı tosınnan bolǵanı joq. Miynet jolında elektr tarmaqları kárxanasında jumıs islegen ákesiniń qasında júrip bul kásiptiń barlıq sırların úyreniwge erisken ol, qızıǵıwshılıǵı arqasında transformator islep úyreniwdi aldına maqset etip qoyadı. Basında kewlindegidey bolıp shıqpasa da ol bul joldan qaytpay maqsetine qaray talpınıp, bárqulla úyrenip, hárekette boladı. Aqırı óziniń niyetine jetip quramalı úskene bolǵan transformatordı islep shıǵarıwǵa miyasar boladı. Bul jolda ol ákesinen, qánigelerden másláhát alıw menen birge, sociallıq tarmaqlardaǵı jol jobalardan da úyrenedi.
-Quramalı hám miyneti awır talap bolǵanı menen óz miynetimizdiń jemisin kórip quwanamız. Xalıqqa paydamız tiyip atırǵanlıǵı jumısımızdıń jáne de alǵa qaray rawajlanıwına tiykar bolmaqta. Keleshekte cexımızdı keńeytip, jańadan jumıs orınların jaratıp, tranformator punktlerin kóplegen aymaqlarǵa jetkeriwdi maqset etip qoydıq,-deydi ol rejeleri haqqında.
Azizdiń cexında islep shıǵarılıp atırǵan transformatorlar tek ǵana respublikamızda emes al, wálayatlarda da óz qarıydarların tappaqta. Jakında ol buyırtpa boyınsha Buxara wálayatına transformatordı aparıp, ornatıp berip qayttı.

-Prezidentimiz tárepinen isbilermenlerge imkaniyatlar jaratılıp, bir qatar jeńillikler berilmekte. Ásirese, engizilgen salıq jeńillikleri biz isbilermenlerdiń jumısların jeńillestirmekte. Usı imkaniyatlardan paydalanıp jaqında jáne de jeńilletilgen kredit alıp, cexımızdıń jumıs kólemin keńeytiwdi rejelestirip atırman. Jańa jumıs orınların jaratıp, jumısshılarǵa jataqxana salıp, sharayatlardı jaratpaqshıman,-deydi ol.
Házirgi waqıtta cexta jumıs qızǵın. Transformatorlardıń sapalı bolıp shıǵıwı ushın qızǵın jumıs islep atırǵan jumısshılar hár qanday iske itibar hám juwapkershilik penen qaraydı. Álbette bul juwapkershilik hám kásipke sadıqlıq jumıs nátiyjesin arttırıp, xalqımızǵa sapalı xızmet etiwge tiykar boladı.

G.Turdıshova, Qaraqalpaqstan xabar agentligi