Máyek – kúndelikli azıq-awqat racionınıń áhmiyetli bólegi bolıp, onıń kólemi mámleket ekonomikasındaǵı awıl xojalıǵı hám azıq-awqat kórsetkishlerinen biri sıpatında úlken áhmiyetke iye. Máyek sarısı quramındaǵı leycitin xolesterin muǵdarın normada saqlawǵa járdem beredi. Máyektiń quramı azıqlıq jaqtan belok, vitaminler hám hár qıylı mikroelementlerge bay. Qalaberdi, qaynatılǵan máyek toyınıw sezimin kúsheytedi hám salmaq joǵaltıwǵa járdem beredi.

Milliy statistika komitetiniń 2025-jıl yanvar-iyun aylarına baylanıslı dáslepki maǵlıwmatlarına bola, respublikamızda barlıq kategoriyadaǵı xojalıqlar tárepinen jámi 4 milliard dana máyek jetistirilgen. Bul kórsetkish ótken jıldıń sáykes dáwirine salıstırǵanda 8,2 procentke ósiwdi ańlatadı hám jergilikli óndiristiń turaqlı rawajlanıp atırǵanın kórsetedi.
Aymaqlar kesiminde máyek jetistiriw kólemi bolsa respublikadaǵı awıl xojalıǵı jumısınıń bólistiriliwi haqqında anıq túsinik beredi. Sonıń ishinde, Tashkent wálayatı 709,5 million dana máyek jetistiriw menen jetekshilik etpekte, bul bolsa mámleket boyınsha máyek jetistiriwdiń tiykarǵı orayı ekenin dálilleydi. Samarqand wálayatı bolsa 596,3 million menen ekinshi orında turıp, úlken óndiris quwatlılıǵına iye aymaq sıpatında ajıralıp turadı. Sonıń menen birge, Namangan wálayatında 330,9 million, Ferǵana wálayatında 324,9 million hám Ándijan wálayatında 314 million dana máyek jetistirilmekte.
Sonday-aq, Surxandárya wálayatınan 296,1 million, Qashqadáryadan 255,4 million, Xorezm wálayatınan 253,3 million, Buxaradan 249,9 million, Nawayı wálayatınan 215,5 million, Qaraqalpaqstan Respublikasınan 200,4 million, Jizzaq wálayatınan 183,6 million dana, Sırdáryadan 92,6 million dana máyek alınǵan.
Bul aymaqlar boyınsha maǵlıwmatlar respublikanıń túrli aymaqlarında awıl xojalıǵı tarawındaǵı óndiristiń rawajlanıw pátlerin, óndiris nátiyjeliligin hám bazardaǵı talap jaǵdayın tereńirek tallaw imkaniyatın beredi.

Dildora DWSMATOVA,
ÓzA