Múnásibet

Ózbekstan ekonomikalıq reformalardaǵı intakerligi hám sırtqı siyasattaǵı pragmatikalıq kózqarasları menen dúnya xalqın ózine tartıp kelmekte. Xalıqaralıq analitikler uzaqtı gózlep ámelge asırılıp atırǵan háreketler, rawajlanıwǵa qoyılıp atırǵan hár bir qádemniń nátiyjesine tolıq isenim menen múnásibet bildirmekte. Sonıń ishinde, Prezident Shavkat Mirziyoevtiń aldıńǵı ideyaları tek ǵana region emes, al pútkil insaniyat ushın awızbirshilikti támiyinleytuǵını atap ótilmekte.
Bul boyınsha Hindstannıń Ózbekstandaǵı Ayrıqsha hám tolıq huqıqlı elshisi Smita Pant xanım óz pikirlerin bildirdi.
– Hindstan Ózbekstannıń uzaq jıllıq sherigi bolıp esaplanadı hám mámleketińizde ámelge asırılıp atırǵan reformalardı baqlap barıp atırmız,-dedi Smita Pant xanım. – Mámleketińiz tek ǵana ekonomikalıq rawajlanıwǵa emes, al regionallıq birge islesiwge de úlken itibar qaratıp atırǵanı bizdi quwandıradı. Birge islesiw ruwxı hám turaqlılıqqa umtılıw bar, bul maqtawǵa ılayıq. Hindstan Bas ministri Narendra Modi Prezident Shavkat Mirziyoevti jaqın dos, áziz jaqın adamım, dep biledi. Eki basshınıń maqset hám kózqarasları bir bolsa, biz ushın kelisilgen baslamalardı ámelge asırıw da ádewir ańsat boladı.
Keyingi jıllarda kóplegen tarawlarda sezilerli nátiyjelerge erisildi. Eń áhmiyetlisi, bilimlendiriw tarawı hám óz-ara baylanıslar bekkemlenbekte. Búgin Ózbekstanda bilim alıp atırǵan sırt elli studentlerdiń sanına qarasaq, eń úlken úlesti Hindstan studentleri quramaqta. Ózbekstanǵa kelip atırǵan hind turistleriniń sanı da artpaqta. Sonıń menen birge sawda hám investiciya baǵdarında da imkaniyatlar keńeymekte, sawda kólemi artıp barmaqta.
Ózbekstanda Hindstan investiciyaları da kóbeymekte. Birge islesiwimiz densawlıqtı saqlaw hám farmacevtika tarawlarında jáne de bekkemlenbekte. Sonday-aq, eki mámleket basshıları bizge jańa wazıypalar qoydı. Jasalma intellekt hám startaplar tarawında birge islesiwdi jolǵa qoyıw boyınsha kelisimlerge erisilmekte.
Ózbekstan – Oraylıq Aziyanıń júregi. Xalıqtıń sanı, ekonomikalıq ósiw pátleri jedellespekte. Ásirese, regionallıq máselelerge qatnas, turaqlılıq hám klimat ózgerislerine baylanıslı baslamalar, Awǵanstan menen baylanıslı máselelerde alıp barılǵan háreketler, bulardıń barlıǵı oǵada áhmiyetli. Ózbekstannıń sırtqı siyasatı júdá pragmatikalıq. Bulardıń barlıǵı ósip baratırǵan xalıq, rawajlanıp atırǵan ekonomika hám globallıq kózqarasqa iye strategiya menen birlesip, elińizdi tek ǵana regionda emes, al onnan tısqarıda da áhmiyetli mámleketke aylandırmaqta. Hindstan bunı qádirleydi.
Ózbekstannıń xalıqaralıq platformalardaǵı belsendiligi bizdi quwandıradı. Ásirese, Prezident Shavkat Mirziyoevtiń Birlesken Milletler Shólkeminiń minberinen áhmiyetli baslamalardı alǵa qoyıp atırǵanı, xalıqaralıq maydanda Ózbekstannıń ornın jáne de bekkemlewge xızmet etpekte. Búgingi kúnde Ózbekstan jetekshisi tárepinen klimat ózgerisleri hám ekologiyalıq mashqalalardı saplastırıwǵa qaratılǵan baslamalardı ayrıqsha atap ótiw kerek. “Jasıl mákan” joybarı meni de qızıqtırdı. Sebebi bul baslama keleshek áwladtı oylap alǵa qoyılmaqta. Bul áwladlar ushın jáne de jaqsı hám turaqlı mákandı qaldırıw degeni.
Eki mámleket qatnasıqlarında Prezident Shavkat Mirziyoevtiń 2018-jılı Hindstanǵa ámelge asırǵan mámleketlik saparı tariyxıy áhmiyetke iye. Keyin ala Ózbekstan jetekshisi Gujarat shtatına da barǵan edi. Bunday joqarı dárejedegi sapar etiwlerde oǵada kóp áhmiyetli qararlar qabıl etilgen. Birge islesiw baylanıslarınıń bekkemleniwinen eki tárep te birdey mápdar.
Hindstan Ózbekstan ushın 1,4 milliard xalıqqa iye iri bazar. Ózbekstan awıl xojalıǵı ónimlerine bizde talap úlken. Biraq, bul hámmesi emes, eń áhmiyetli másele – xalıqlardı jáne de jaqınlastırıw. Ózbekstanǵa qızıǵıwshılıq tek ǵana ekonomikalıq imkaniyatlarǵa baylanıslı emes, al, júrekten júrekke, kewilden kewilge shekemgi mádeniy jaqınlıq bolıp tabıladı. Sizlerdiń gózzal mádeniyatıńız bizdi ózine tartadı.
Ǵárezsizlik – hár qanday xalıq ushın eń áhmiyetli qádiriyat. Pursattan paydalanıp, jaqında belgilengen Watanıńız ǵárezsizliginiń otız tórt jıllıǵı múnásibeti menen Hindstan xalqı hám mámleketi atınan Ózbekstan xalqına eń qızǵın qutlıqlawlarımdı bildiremen.

ÓzAnıń xabarshısı
Abdulaziz RUSTAMOV jazıp aldı.