Senatta Jergilikli hákimiyat wákillikli uyımlarınıń jumısın kúsheytiwge járdemlesiw komissiyasınıń baslıǵı Anvar Toychiev Koreya Respublikasınıń Miryang qalası Jergilikli wákillikli uyımınıń baslıǵı Xo Xong basshılıǵındaǵı delegaciya menen ushırasıw ótkerdi.

Onda Ózbekstan hám Koreya Respublikası arasındaǵı kóp tárepleme birge islesiw strategiyalıq sheriklik dárejesine kóterilgeni atap ótildi. Mámleketler basshılarınıń siyasiy erk-ıqrarı mámleketleraralıq qatnasıqlardıń jáne de rawajlanıwı hám bekkemleniwinde ayrıqsha áhmiyetke iye ekeni atap ótildi.
Eki mámlekettiń barlıq baǵdarlardaǵı birge islesiwi, atap aytqanda, awıl hám suw xojalıǵı tarawlarındaǵı ekonomikalıq hám investiciyalıq joybarlardı keńeytiw jáne aymaqlararalıq birge islesiwdi rawajlandırıw máseleleri boyınsha pikir alısıldı.
Parlamentleraralıq sóylesiwdi bekkemlew, doslıq toparlarınıń jumısın jedellestiriw hám keń kólemdegi birgeliktegi ilajlardı shólkemlestiriw máseleleri de dodalandı.
“Elektron parlament” sistemasın engiziw, “aqıllı awıl xojalıǵı” joybarların ámelge asırıw, sonday-aq, ekologiya hám turaqlı rawajlanıw maqsetlerine erisiwde parlamentleraralıq birge islesiwdi kúsheytiw boyınsha usınıslar bildirildi.

N.Abduraimova, ÓzA