Senat jalpı májilisinde Ózbekstan – sociallıq mámleket, degen konstituciyalıq principti ámelge asırıw ushın barlıq imkaniyatlardı jumsaw zárúrligine itibar qaratıldı.

Senat Baslıǵı Tanzila Norboeva adamlarımız ushın múnásip turmıs sharayatların jaratıw, jańa quwatlıqlar, zamanagóy joybarlardı iske qosıp, xalıqtı, ásirese, jaslarımızdı múnásip dáramatlı miynet penen bánt etiw tiykarǵı wazıypalardan esaplanatuǵının ayrıqsha atap ótti. Xabarıńız bar, jaqında Prezidentimizdiń basshılıǵında ótken májiliste joqarı oqıw orınları pitkeriwshileriniń bántligin támiyinlew máseleleri hár tárepleme dodalandı. Bul baǵdardaǵı mashqalalar tallandı.
Qosımsha imkaniyatlar kórsetip ótildi. Áhmiyetli ámeliy mexanizmler belgilep berildi. Atap aytqanda, usı jılǵı 92 mıń pitkeriwshiniń keyingi jumısında járdemlesiw ilajları belgilendi.
– Álbette, bul óz-ózinen bolmaydı, – dedi T.Norboeva. – Tek ǵana atqarıw uyımları emes, al wákillikli institutlar, yaǵnıy biz senatorlar, deputatlar da bul jumısqa bas qatırıwımız kerek. Prezidentimiz de bul boyınsha bizge isenim bildirdi. Senat keńesiniń 13-avgust kúni bolıp ótken májilisinde bul máselelerdi tiyisli ministrlikler, uyımlar, aymaqlar menen hár tárepleme dodalap, ayrıqsha qarar qabıl ettik. Joqarı oqıw orınları pitkeriwshileriniń bántligin támiyinlew jumısların shólkemlestiriw boyınsha Respublikalıq jumısshı topar, qalaberse, senatorlar hám jergilikli keńeslerdiń basshıları basshılıǵında aymaqlıq jumısshı toparlar shólkemlestirildi. 37 joqarı oqıw ornınıń derlik 49 mıńnan aslam pitkeriwshisin jumısqa jaylastırıw boyınsha aymaqlar, tarmaqlar kesiminde anıq ilajlar, mexanizmler, múddetler belgilep alındı.
“Pitkeriwshilerdiń bántligin támiyinlew máselelerine ayrıqsha qatnas jasaw kerek. Rásmiylik ushın ǵana atına jumısqa ornalastırıw jaǵdayları yamasa onnan da jamanı – qurǵaq statistika ushın qosıp jazıwlarǵa pútkilley jol qoyılmawı shárt. Sol sebepli, tiyisli elektron bazalarǵa kirgizilgen maǵlıwmatlardıń haqıyqıylıǵı úyrenip barılıwı zárúr. Aymaqlıq jumısshı toparlar menen birgelikte pitkeriwshilerdi jumısqa jaylastırıwǵa baylanıslı processlerde payda bolatuǵın mashqalalardı jedellik penen sheshiw ilajları kóriliwi kerek. Bilimlendiriw, medicina sıyaqlı áhmiyetli sociallıq tarawlarda bir aymaqtan basqa aymaqqa barıp islewine tuwra kelgen pitkeriwshiler ushın zárúr sharayatlardıń jaratılıwı aymaq basshılarınıń turaqlı itibarında bolıwı kerek. Bul baǵdardaǵı jumıslardıń jaǵdayın hár hápte de jumıs tártibinde dodalap baramız,” dedi Senat Baslıǵı.
Jaslardıń bántligin támiyinlew – aktual sociallıq áhmiyetke iye másele. Sonlıqtan, barlıq senatorlar hám húkimet wákillerinen, ásirese, jergilikli keńesler hám aymaq basshılarınan usı wazıypalardı óz waqtında, tolıq hám sapalı ámelge asırıwǵa juwapkershilik penen qaraw soraldı.

ÓzA