Elimizde fizikalıq hám yuridikalıq táreplerdiń huqıqları menen nızamlı máplerin isenimli qorǵawǵa qaratılǵan izbe-iz reformalar ámelge asırılmaqta.

Norma dóretiwshiligi jumısında huqıqıy boslıqlardı toltırıw boyınsha anıq ilajlar belgilengen hám huqıqtı qollanıw ámeliyatınıń birdeyligin támiyinlewge de ayrıqsha itibar qaratılmaqta.
Senattıń jalpı májilisinde huqıqtı qollanıwda birden-bir ámeliyattı támiyinlewge tosqınlıq etiwshi, korrupciyalıq qáwip-qáterlerdi keltirip shıǵaratuǵın jáne xalıq hám isbilermenlerdiń artıqsha sergizdan bolıwına sebep bolǵan ayırım normalardı huqıqıy jaqtan tártipke salıw zárúrligi júzege kelgeni atap ótildi..
Usı maqsette islep shıǵılǵan “Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam menen 12 nızam hújjetine ózgerisler hám qosımshalar kirgizilmekte.
Olardıń arasında “Licenziyalaw, ruqsat beriw hám xabardar etiw tártip-qaǵıydaları haqqında”ǵı, “Mámleketlik bajı haqqında”ǵı, “Mektepke shekemgi bilimlendiriw hám tárbiya haqqında”ǵı, “Bilimlendiriw haqqında”ǵı, “Xalıqtıń bántligi haqqında”ǵı nızamlar hám Salıq kodeksi bar.
Senatorlar maqullaǵan bul nızam fizikalıq hám yuridikalıq táreplerdiń huqıqları menen nızamlı mápleriniń nátiyjeli qorǵalıwın támiyinlew hám korrupciyalıq qáwip-qáterlerdi saplastırıwǵa xızmet etedi.

N.Abduraimova, N.Haydarov (surat), ÓzA