2025-jıldıń 1-sentyabr kúni Qıtaydıń Tyanczin qalasında bolıp ótken “Shanxay birge islesiw shólkemi plyus” formatındaǵı májilistegi shıǵıp sóylegen sózinde Ózbekstan Respublikası Prezidenti Shavkat Mirziyoev búgingi tınısh emes xalıqaralıq sharayatta ShBSh turaqlı hám ádil dúnya tártibin támiyinlewdiń isenimli tayanıshına aylanıp atırǵanın atap ótti. Tartıs hám kelispewshilikler tolqının toqtatıw, isenimdi tiklew, tınısh-tatıw turmısqa umtılıw, xalıqaralıq huqıqtıń ulıwma tán alınǵan principleri menen normaların húrmet etiw áhmiyetli ekenligi atap ótildi.

Usı jerde Ózbekstan Basshısı Gaza sektorındaǵı jaǵday barǵan sayın keskinlesip atırǵanın hám gumanitarlıq jaǵday tómenlep atırǵanın atap ótti. Shavkat Mirziyoev Palestina-Izrail mashqalasın “eki xalıq ushın eki mámleket” principi tiykarında ádil sheshiw ǵana Jaqın Shıǵıstaǵı kelispewshilikti toqtatıwı múmkin ekenligin jáne bir márte atap ótti.
Sońǵı jılları Palestinadaǵı, sonıń ishinde Gaza sektorındaǵı jaǵday dúnya jámiyetshiliginiń dıqqat orayında turǵanın atap ótiw kerek. Búgingi kúnde Palestina xalqınıń dári-dármaq, azıq-awqat, taza suw hám basqa da turmıslıq resurslardan paydalanıw imkaniyatı sheklengen.
Usı jerde, Ózbekstan áskeriy háreketler baslanǵanınan berli bul kelispewshilikti xalıqaralıq huqıq normaları tiykarında tınısh jol menen tezirek sheshiw tárepdarı bolıp kelmekte. Ózbekstan Prezidenti Gazadaǵı quramalı gumanitar jaǵdaydı jaqsılaw, regionda tınıshlıq hám turaqlılıq ornatıwǵa baylanıslı umtılısların hám usınısların Islam birge islesiw shólkemi, Túrkiy mámleketler shólkemi, Ekonomikalıq birge islesiw shólkemi sıyaqlı iri xalıqaralıq shólkemlerdiń minberlerinen de bildirip ótken.
Ózbekstan tárepi kelispewshilikti kelisim hám siyasiy-diplomatiyalıq qurallar menen sheshiwge shaqırıp ǵana qoymastan, Gaza sektorındaǵı awır gumanitarlıq jaǵdaydı jaqsılaw ushın óziniń ámeliy hám biyǵárez járdemin kórsetpekte.
Sonıń ishinde, 2023-jılı Shavkat Mirziyoev Gaza sektorı xalqına járdem kórsetiw ushın Birlesken Milletler Shólkeminiń Jaqın Shıǵıs agentligine 1 million 500 mıń dollar ajıratıw haqqında qarar qabıl etti. 2024-jılı Prezidentimizdiń baslaması menen 100 palestinalı jaradar hayallar hám balalar ózleriniń joldasları menen birge Ózbekstanǵa waqtınsha evakuaciya etildi. Olar reabilitaciya orayları hám emlewxanalarǵa jaylastırıldı.
Ózbekstan Basshılıǵı bunday jumıslar menen sheklenbegen halda, palestinalı miymanlardıń jámiyetimizge beyimlese alıwına járdem kórsetiw maqsetinde qosımsha ilajlar kórmekte. Usı múnásibet penen Prezident Shavkat Mirziyoev 2025-jıl 14-avgustta Ózbekstanǵa kelgen Palestina puqaralarına turaqlı ǵamxorlıq kórsetiw hám sociallıq qollap-quwatlaw haqqındaǵı pármanǵa qol qoydı.
Járdemdi muwapıqlastırıw maqsetinde palestinalı nawqaslar hám olarǵa joldaslıq etiwshilerdi Ózbekstanda jasawǵa beyimlestiriw procesine járdemlesiw boyınsha Respublikalıq komissiya dúzildi. Bul komissiyanıń jumısshı uyımı etip Sociallıq qorǵaw milliy agentligi belgilendi. Orınlarda miymanlar menen tikkeley islesiw “máhálle jetiligi” hám “Insan” sociallıq xızmetler orayları tárepinen ámelge asırıladı. Hár bir shańaraq ushın bir ay múddette respublikalıq hám jergilikli atqarıw hákimiyatı uyımları, sonday-aq, olardıń bólimleri tárepinen orınlanıwı májbúriy bolǵan sociallıq xızmetler hám járdem kórsetiwdiń individual rejesi islep shıǵıladı.
Prezident, bunnan tısqarı, mámlekette Palestina puqaralarınıń jasaw sharayatı hám sociallıq qollap-quwatlanıwın támiyinlew boyınsha ilajlardı qarjılandırıw ushın Sociallıq qorǵaw milliy agentliginde arnawlı qor shólkemlestiriliwin maqulladı. Bul qor qarjıları miymanlarǵa sharayat jaratıw hám zárúr xızmetler kórsetiw, olardıń qárejetlerin qaplaw, materiallıq járdem kórsetiw hám basqa da bir qatar qollap-quwatlaw ilajlarına baǵdarlanadı.
Ózbekstan Basshısınıń Gazadaǵı gumanitar jaǵdaydı bunnan bılay da turaqlastırıw, kelispewshilikti tez pursatta kelisim jolı menen sheshiwge qaratılǵan shaqırıqları, sonday-aq, Palestina xalqına kórsetip atırǵan joqarı húrmeti hám ámeliy háreketleri ullı mártebeli ózbek xalqınıń erk-ıqrarın ayqın kórsetip tur.
Ózbekstan Prezidentiniń tiyisli baslamaları menen Gazada qıyın jaǵdayǵa túsip qalǵan xalıqqa hár tárepleme biyǵárez gumanitarlıq járdem kórsetilip atırǵanı mámleketimizdiń ulıwma insanıylıq qádiriyatlarǵa húrmetin, milletleraralıq hám dinleraralıq óz-ara tatıwlıq principlerine, qońsı mámleketler menen tatıw qońsıshılıq siyasatın alıp barıwǵa sadıqlıǵın jáne bir márte tastıyıqladı. Búgingi kúnde elimizde 130 dan aslam millet hám xalıq, 16 konfessiya wákilleri keńpeyillik principi tiykarında tınısh-tatıw jasap atırǵanın atap ótiw orınlı.
Prezident Shavkat Mirziyoevtiń Jaqın Shıǵıstaǵı bul kelispewshilikti xalıqaralıq huqıq normaları tiykarında tınısh jol menen sheshiwge qaratılǵan bunday jedel ámeliy háreketleriniń tiykarǵı negizinde tınıshlıqtı súyetuǵın pragmatikalıq sırtqı siyasat jatır. Tınıshlıq hám turaqlılıq húkim súrgen regionda izbe-iz rawajlanıw, ekonomikalıq-sociallıq rawajlanıw hám erteńgi kúnge isenim boladı.
Usı kózqarastan, Ózbekstan Respublikası Prezidentiniń ShBSh minberinen turıp tınıshlıq hám tatıwlıq erteńgi kúnniń rawajlanıwınıń tiykarǵı girewi ekenin, bul jerde hár qıylı kelispewshiliklerdiń tolqının úziw, Gazadaǵı jaǵdaydı tınısh jol menen sheshiwge qaratılǵan múrájatı tınıshlıqtı súyiwshi ózbek xalqınıń erk-ıqrarın, maqset hám tileklerin ózinde sáwlelendirdi. Usı jerde Mámleketimiz basshısınıń dúnya jámiyetshiliginiń kelispewshilikti sheshiwde jáne de jedel háreketlerdi ámelge asırıwǵa baylanıslı shaqırıǵı kóp tárepleme birge islesiwdi rawajlandırıwda xalıqaralıq qáwipsizlikti támiyinlew máselelerine itibardı kúsheytiw zárúrligin kórsetedi.

ÓzA