1-sentyabr – Ózbekstan ǵárezsizligi kúni Hindstannıń belgili arxitekturalıq esteliklerinen biri – Deli qalasındaǵı Qutb Minar birinshi márte mámleketimiz bayraǵınıń reńleri menen jaqtılandırıldı.

Bul hind xalqınıń ózbek xalqına bolǵan húrmeti hám doslıǵınıń belgisi, sonday-aq, Ózbekstan ǵárezsizliginiń 34 jıllıǵına ózine tán bayram sawǵası boldı.
Hindstan 1991-jılı 26-dekabr kúni elimiz ǵárezsizligin birinshilerden bolıp tán alǵan. Kóp ótpey, 1992-jıl 18-mart kúni Tashkent qalasında diplomatiyalıq qatnasıqlar ornatiw haqqında bildiriwge qol qoyılǵan. Ótken dáwir ishinde Ózbekstan hám Hindstan arasındaǵı baylanıslar izbe-iz rawajlandı. Atap aytqanda, 2024-jıldıń juwmaǵı menen óz-ara sawda kólemi derlik 1 milliard dollarǵa jetti.
Hindstanda hár jılı Ózbekstan ǵárezsizligi kúnine baǵıshlanǵan ilajlar ótkeriledi, mámlekettiń jetekshi ǵalaba xabar qurallarında usı temaǵa baylanıslı maqalalar basıp shıǵarıladı. Ásirese, bıyılǵı bayram ózgeshe saltanat penen belgilendi, yaǵnıy tariyxta birinshi márte gerbishten qurılǵan dúnyadaǵı eń biyik minara Ózbekstan bayraǵınıń reńleri menen jaqtılandırıldı.
Qutb Minar 1193-jılı Deli sultanlıǵınıń tiykarın salıwshısı Qutbiddin Aybektiń baslaması menen qurılǵan. Qurılıs jumısları XIV ásirde juwmaqlangan. Onıń biyikligi 72,6 metrdi quraydı. 1993-jılı bul kompleks YuNESKOnıń Dúnya júzilik miyrası dizimine kirgizilgen.

Aziza ALIMOVA, ÓzA