Ǵárezsiz elde, azatlıq hám tınıshlıq ortalıǵında jasap, bayramlar ótkerer ekenbiz, bul kúnlerdi bizge saǵınǵan, onıń ushın gúresken insanlar erksiz eske túsedi. Millettiń eslewi, maqtanıshı, hújdanı bar, olardıń pidayılıǵı biykar ketpeydi, áwladlar tárepinen bárqulla qádirlenedi.

Ǵárezsizlik bayramı qarsańında ótetuǵın Repressiya qurbanların eslew kúninde mine, usınday tereń mazmun jámlengen.
Usı sáne múnásibeti menen 29-avgust kúni Sheyitler esteligi qıyabanına mámleketlik hám jámiyetlik shólkemlerdiń wákilleri, nuranıylar, zıyalılar jıynaldı.
Máresimde Prezident Shavkat Mirziyoev qatnastı.
Watan pidayıları atına Quran oqıldı. Elge as tartıldı.
Qıyabandaǵı rámziy qábir janında da Quran oqıldı. Usı jerde ulama hám zıyalılar menen tariyxtı úyreniw hám jaslarǵa úyretiw, ǵárezsizlik hám tınıshlıqtı qádirlew haqqında sáwbet boldı.
– Hár jılı Ǵárezsizlik bayramı aldınan Watanımızdıń azatlıǵı jolında janın pidá etken ata-babalarımızǵa pátiya etemiz. Watan ushın, millet ushın, xalıq ushın gúresken qaharman ata-babalarımızdıń mártligi biz ushın hámiyshe ibrat mektebi bolıp qaladı, – dedi mámleketimiz basshısı.
Sol qıyın jıllarda 100 mıńnan aslam biygúna watanlasımız repressiyaǵa ushıraǵanı bizge belgili. Mıńlaǵan watanlaslarımız “xalıq dushpanı” degen nahaq ayıplaw menen atıp taslanǵan, onnan da kóbisi súrgin etilgen. Olardıń izinen mıńlaǵan hayallar jesir, balalar jetim bolıp qalǵan. Aradan derlik bir ásir ótken bolsa da, sol qorqınıshlı dáwirdi tereń qayǵı menen esleymiz.
Bular búgingi erkin turmısımızdı jáne de qádirlewge, ǵárezsizlikti bekkemlewge iytermeleytuǵını atap ótildi.
– Watanımız pidayıların ulıǵlaw, esteligin máńgilestiriw boyınsha kóp jumıslar islep atırmız, – dedi Shavkat Mirziyoev. – Keyingi segiz jılda 1 mıń 200 den aslam japakesh ata-babalarımızdıń atı aqlandı. “Repressiya qurbanları esteligi” muzeyi rekonstrukciyalanıp, mıńlaǵan jańa hújjetler menen tolıqtırıldı. Aymaqlarda da usınday muzeyler shólkemlestirildi. Bıyıl jadidshilik háreketiniń jetekshisi Mahmudxwja Behbudiy tuwılǵan kúniniń 150 jıllıǵın belgilep atırmız. Buxara qalasında Jadidler miyrası mámleketlik muzeyi shólkemlestirilmekte.
Endi bulardıń mazmunın, “tiri” tariyxımızdı xalqımızǵa keńirek jetkeriw kerek.
Mine, ótken jıldan baslap, hár jılı oktyabrdiń birinshi háptesin Siyasiy repressiya qurbanların eslew hápteligi sıpatında belgiledik. Bıyıl bul ilaj Eslew hám tárbiya hápteligi sıpatında ótkeriledi. Xosh, bul háptelikte xalqımızǵa nelerdi jetkeremiz, jaslarımızǵa nelerdi úyretemiz? Tariyxshı ilimpazlar, jazıwshı-shayırlar menen birge bunı tereńirek oylap, xalıqshıl, ǵalabalıq etip jolǵa qoyıw kerek. Mektep hám universitetlerde qosımsha sabaqlar, telekanallarda arnawlı kórsetiwler beriw, jaslar arasında tańlawlar ótkeriw múmkin. Ǵárezsizlik qanday ullı jemis ekenin, qanday kúshli ata-babalarımız bar ekenin eldiń qan-qanına sińdiriw kerek. Eger jaslarımız ruwxıy jaqtan kúshli bolsa, óz aldına úlken maqsetler qoyadı, pánlerdi de jaqsı oqıydı, hár tárepleme jetik insanlar bolıp jetilisedi.
Bul baǵdarda millet aǵartıwshılarınıń ómirin úyreniw oǵada áhmiyetli ekeni atap ótildi.
– Jadid babalarımız hár tarawda alda edi. Birinshi ózbek romanı, teatr hám kino shıǵarmaları, hár qıylı pánler boyınsha sabaqlıqlardı áne, olar jaratqan. Ótken ásirdiń 20-jıllarında Germaniyada bilim alǵan túrkstanlı studentler repressiyaǵa ushıramaǵanda, pútkil jámiyetti ózgertken bolar edi. Bar tariyxımızdı durıs jetkere alsaq, jaslarımız basqa qaharman izlemeydi, jetik babalarımız bunıń ushın tayar úlgi,-dedi Prezident.
Bunday ruwxıy tiykar ulıwma milliy birlik hám turaqlılıq ushın da zárúr. Búgin dúnyadaǵı jaǵday qáweterli bolıp barmaqta. Mámleketlerdiń ǵárezsizligine qáwipler payda bolmaqta. Bulardıń barlıǵı bizden bárqulla sergek hám awızbirshilikli bolıwdı, reformalardı izbe-iz dawam ettiriwdi talap etedi.
Jaratqanǵa shúkir, elimiz tınısh, adamlar erteńgi kúnge isenim menen jasamaqta. Bul – eń úlken baylıǵımız. Ulamalar elimizde usı tınıshlıq-tatıwlıq, qut-bereket turaqlı bolıwın tilep duwa etti.

ÓzA