Aziya rawajlanıw banki (ARB) Ózbekstan Respublikasına Oraylıq Aziya regionallıq ekonomikalıq birge islesiw-2 koridorınıń tiykarǵı bólegin modernizaciyalaw ushın 233,1 million AQSh dolları muǵdarında qarız ajıratıwdı maqulladı.

Joybar regionallıq baylanıstı jaqsılaw, sayaxat waqtın qısqartıw, jol háreketi qáwipsizligin arttırıw hám mámlekettiń batıs aymaqlarında transport infrastrukturasınıń klimat ózgeriwine shıdamlılıǵın arttırıwǵa qaratılǵan.
Atap ótiliwinshe, bul joybar Qaraqalpaqstan Respublikasındaǵı Ǵuzar-Buxara-Nókis-Beynew (A380) avtomobil jolınıń shama menen 87 kilometrin rekonstrukciyalawdı názerde tutadı. Joybar sheńberinde 75 kilometrlik jańa aylanba jol (Tórtkúl – Ellikqala – Beruniy) qurılıp, házirgi A380 jolınıń 12 kilometrlik bólegi rekonstrukciyalanadı.
Joybar klimat ózgeriwi hám ekstremal hawa-rayı hádiyseleriniń tásirine shıdam beriw ushın beton qaplamalar, kóterilgen jaǵalıqlar hám jetilistirilgen drenaj sistemaların óz ishine alǵan klimatqa shıdamlılıq ózgesheliklerin qamtıp aladı.
“Bul investiciyalar Ózbekstannıń regionallıq tranzit orayı sıpatındaǵı rolin bekkemlep, Qaraqalpaqstanda inklyuziv ekonomikalıq ósiwdi qollap-quwatlaydı. Klimatqa shıdamlı infrastruktura hám aqıllı transport sistemaların engiziw uzaq múddetli turaqlılıqtı támiyinlep, adamlar hám biznes ushın sayaxattı qáwipsiz hám nátiyjelirek etedi”, – dedi ARBnıń Ózbekstandaǵı wákilxanasınıń direktorı Kanokpan Lao-Araya.
Joybardıń ulıwma bahası 293,7 million AQSh dolları bolıp, Ózbekstan húkimetiniń úlesi 60,6 million AQSh dolların quraydı.
Maǵlıwmat ushın, ARB hám Ózbekstan birge islesiwine bıyıl 30 jıl toldı. Ózbekstan ARBǵa 1995-jılı aǵza bolǵanınan berli Bank mámleketlik sektorǵa ulıwma bahası derlik 14,3 milliard AQSh dolları muǵdarında qarız, grantlar hám texnikalıq járdem ajıratqan.

Qaraqalpaqstan xabar agentligi