Ózbekstan sırtqı isler ministri Baxtiyor Saidov búgin Yaponiya sırtqı isler ministri Ivaya Takeshi menen ushırastı, dep xabar bermekte “Dunyo” MA.

“Búgin Yaponiya sırtqı isler ministri Ivaya Takeshi mırza menen Ózbekstan Respublikası Sırtqı isler ministrliginde ushırasqanımızdan quwanıshlımız, – dep jazdı Ózbekstan SIM basshısı óziniń telegram kanalında. – Kásiplesim menen birgelikte sırtqı isler ministrleri dárejesindegi birinshi strategiyalıq ushırasıwdı ótkerdik.
Házirgi kúnde ximiya sanaatı hám energetika sıyaqlı bir qatar áhmiyetli tarawlarda iri joybarlardı ámelge asırmaqtamız. IT, transport, kánshilik, “jasıl” energetika hám basqa da baǵdarlar keleshektegi birge islesiwimiz ushın tartımlı baǵdarlar bolıp qalmaqta.
Búgin biz qol qoyǵan Ózbekstan Respublikası Sırtqı isler ministrligi hám Yaponiya Sırtqı isler ministrligi arasındaǵı Strategiyalıq qarım-qatnas boyınsha Birgeliktegi kommyunike, álbette, Ózbekstan-Yaponiya qatnasıqların bekkemlewge xızmet etedi – siyasattan baslap ekonomikaǵa shekem, bilimlendiriwden xalıqaralıq baylanıslarǵa shekem”.
Yaponiya SIM basshısı bir kún aldın Ózbekstannıń jetekshi elektron hám baspa basılımlarında járiyalanǵan maqalasında onıń mámleketi Ózbekstannıń ekonomikalıq hám sociallıq tarawlardaǵı reformalardı alǵa qoyıw boyınsha háreketlerin tolıq qollap-quwatlaytuǵının, onıń rawajlanıwına, sonıń ishinde, infrastrukturanı jaratıw hám kadrlar tayarlaw sıyaqlı tarawlarda hár tárepleme járdem kórsetetuǵının ayrıqsha atap ótken.

Qaraqalpaqstan xabar agentligi