“Kámbaǵal shańaraqlar reestri”ne kirgizilgen shańaraqlardıń jumıssız aǵzaları yamasa rásmiy dáramatqa iye bolmaǵan jumıs izlep atırǵan shaxslardı kásip hám shet tillerge oqıtıw qárejetlerin vaucher tiykarında qaplap beriw tártibi belgilendi. Kámbaǵallıqtı qısqartıw hám bántlik ministrliginiń ecosys.mehnat.uz sistemasında vaucher tiykarında usı kategoriyadaǵı shaxslardı oqıtatuǵın bilimlendiriw shólkemleriniń elektron reestri júrgiziledi.

Talap etiwshi vaucher alıw ushın Ministrliktiń rayon (qala) lıq bólimlerine tikkeley yamasa máhállelerdegi hákim járdemshileri arqalı, sonday-aq, ecosys.mehnat.uz sisteması arqalı arza menen múrájat etiwi múmkin.
Talap etiwshilerge, birinshi gezekte, rayon (qala) lıq bólimler tárepinen 1 kún múddette onıń qánigeliginen kelip shıǵıp, bar bos (vakant) jumıs orınları usınıs etiledi.
Puqaranıń qánigeligi bolmaǵanda yamasa usınıs etilgen jumıs ornı maqul bolmaǵanda, vaucher beriw máselesi kórip shıǵıladı.
Onda talaban ecosys.mehnat.uz sistemasında skoringten ótkeriledi hám onıń belgilengen kategoriyalardan birine kiretuǵını anıqlansa, ol vaucher alıw huqıqına iye boladı.
Talap etiwshi vaucherden 3 ay múddette paydalanıwı kerek.
Vaucher tiykarında kásip hám shet tillerin úyreniw tilegin bildirgen talaban 1 márte biypul oqıw huqıqına iye.

Qaraqalpaqstan xabar agentligi