Prezident Shavkat Mirziyoev 27-avgust kúni Ózbekstan Milliy muzeyiniń qurılısına irge tasın qoydı.

Mámleketimiz ǵárezsizligi milliy ózligimizdi júzege shıǵarıp, iygilikli háreketlerge tiykar bolıp kelmekte. Hár jılǵıday, bul retki ǵárezsizlik bayramı da jaqsı jańalıqlarǵa sebep bolmaqta. Usınday tariyxıy waqıyalardan biri jańa Milliy muzeyge tiykar salınıwı bolıp tabıladı.
Sapar waqtında mámleketimiz basshısına bul imarattıń joybarı hám ózgeshelikleri, qurılıs basqıshları haqqında málimleme berildi.
Muzey Mádeniyat hám kórkem ónerdi rawajlandırıw qorınıń qáwenderliginde Yaponiyanıń “Tadao Ando Architect & Associates” arxitektura byurosı hám Germaniyanıń “Atelier Brückner”kompaniyası tárepinen joybarlastırılǵan. Onıń sırtqı kórinisi sheńber, tórt múyesh hám úsh múyesh formasında bolıp, Shıǵıs hám Batıs mádeniyatın ózinde birlestiredi. Kompleks 3 qabatlı muzey, 2 qabatlı jer tóle hám járdemshi imaratlardan ibarat boladı. Qıtaydıń “CSCEC International Construction” kompaniyası tárepinen qurıladı.
Paytaxtımızda usı muzeydiń qurılısına baǵıshlanǵan máresim bolıp ótti. Usı múnásibet penen Ózbekstan Milliy baǵı janındaǵı maydanda mádeniyat hám kórkem óner ǵayratkerleri, ilimpazlar hám jazıwshılar, nuraniylar, jámiyetshilik wákilleri jıynaldı.
– Barlıq tarawda rawajlanıw menen birge qádiriyatlarımızdı tiklewge háreket etip atırmız. Islam civilizaciyası orayı, Imam Buxariy kompleksi, Olimpiada qalashası sıyaqlı úlken imaratlardı qurıp atırmız. Bunıń tiykarǵı maqseti usı, bul imaratlar xalqımızdıń múlkine aylanıp qalıwı kerek. Mine, endi jáne bir tariyxıy kompleks – Ózbekstan Milliy muzeyiniń qurılısın baslap atırmız. Bul muzey úsh mıń jıllıq bay tariyxımızdı adamlarǵa, dúnya jámiyetshiligine hám keleshek áwladqa jetkeretuǵın ilim-aǵartıwshılıq hám mádeniyat orayı boladı, – dedi Shavkat Mirziyoev.
Atap ótilgenindey, házirgi waqıtta tek ǵana Tashkenttegi 30 muzeyde 1 millionnan aslam eksponat bar. Olardıń 100 mıńı Mámleketlik kórkem óner muzeyinde bolıp, sonnan tek ǵana 2 mıń 400 i kórgizbege qoyılǵan. Kórgizbe zalları jeterli bolmaǵanı sebepli 97 mıńnan aslamı qoymaxanada saqlanbaqta.
– Oraylıq Aziya, Qıtay, Yaponiya, Hindstan hám Evropa mámleketleriniń mádeniyatın ózinde sáwlelendirgen bul biybaha kórkem óner dóretpeleri tek ǵana biziń emes, al pútkil insaniyattıń sheksiz baylıǵı bolıp esaplanadı. Olardı qásterlep-saqlap, keleshek áwladlar ushın zıyansız jetkeriw, dúnya jámiyetshiligine kórsetiw arqalı mámleketimizdiń bay tariyxı hám mádeniyatın ulıǵlaw bárshemizdiń muqaddes minnetimiz, – dep atap ótti Prezident.
Bunday sawlatlı muzey elimiz tariyxında birinshi márte qurılmaqta. Onıń ulıwma maydanı 40 mıń kvadrat metr boladı. Kórgizbe zalları, kitapxana, restavraciya laboratoriyaları hám eksponatlardı saqlaw xanalarında eń zamanagóy qolaylıqlar shólkemlestiriledi.
Bul arqalı házirgi waqıtta paytaxtımızdıń hár qıylı muzeylerinde shashaw jaylasqan tariyxıy eksponatlar, eski hám zamanagóy kórkem óner dóretpelerin bir pútin kóriw múmkin boladı. Ulıwma, muzeyde bir waqıttıń ózinde 10 mıńǵa shamalas eksponattı kórsetiw imkaniyatı jaratıladı.
Bunnan tısqarı, 4 mıń kvadrat metr maydanda konferenciya zalları, auditoriya hám restoranlar, balalar maydanshaları jaylasadı.
Muzey iske qosılsa, átirapındaǵı Abulqosim medresesi, Xalıqlar doslıǵı sarayı hám Ózbekstan Milliy baǵı menen bir jerde tutas arxitekturalıq kompoziciyaǵa aylanadı. Watanlaslarımız hám sırt elli turistler keletuǵın tematikalıq turizm dárgayı boladı.
Keleshekte bul muzey dúnyaǵa belgili Luvr, Metropoliten hám Britaniya muzeyleri menen tıǵız birge islesiw ornatıp, siyrek ushırasatuǵın eksponatlar alıp kelinedi hám kórgizbeler shólkemlestiriledi.
– Jańadan qurılatuǵın kompleks mámleketimizdiń jáhán tariyxı hám rawajlanıwında tutqan ornın jáne de ayqın kórsetetuǵınına isenemen. Bir jıl emes, on jıl emes, kóp jıllar dawamında xalqımızǵa xızmet etedi, – dedi Shavkat Mirziyoev sóziniń juwmaǵında.
Bunnan soń mámleketimiz basshısı komplekstiń tırnaǵına kapsula qoyıp, qurılıstı baslap berdi.

ÓzA