Amerika Qurama Shtatlarınıń Nyu-York shtatı Sirakuz qalasında “Watanlaslar regionallıq forumı” ótkerildi.

Ózbekstan Respublikası Milletleraralıq qatnasıqlar hám sırt eldegi watanlaslar máseleleri boyınsha komiteti hám “Vatandoshlar” jámiyetlik fondı tárepinen shólkemlestirilgen bul forumǵa AQSh hám Kanadada jasaytuǵın 300 ge shamalas watanlaslarımız qatnastı.
Keyingi jıllarda sırt elde jasap atırǵan watanlaslar menen turaqlı qarım-qatnas ornatıw, olardıń elimizde alıp barılıp atırǵan reformalardaǵı qatnasın qollap-quwatlaw, sonday-aq, huqıqları menen máplerin hár tárepleme qorǵaw mámleketimiz siyasatınıń áhmiyetli baǵdarlarınan birine aylandı.
Prezidentimiz Shavkat Mirziyoev bárqulla atap ótkenindey, “Qay jerde jasamasın, hár bir watanlasımız – Watanımızdıń ajıralmas bir bólegi, onıń ruwxıy elshisi, maqtanıshı hám úmiti bolıp esaplanadı”.
Bul forum da ózbek jámiyeti ushın tek ǵana ruwxıy birlesiw ornı emes, al ámeliyatta jańasha birge islesiw jolların ashıp beretuǵın strategiyalıq maydan wazıypasın atqaradı.
Forumda Ózbekstan Respublikası Milletleraralıq qatnasıqlar hám sırt eldegi watanlaslar máseleleri boyınsha komitetiniń baslıǵı Qahramon Sariev shıǵıp sóylep, sırt eldegi watanlaslar menen tıǵız baylanıslar ornatıw baǵdarında ámelge asırılıp atırǵan jumıslarǵa toqtap ótti. Sonday-aq, isbilermenlik platformaların jaratıw, jámiyetlik turmıstı sociallıq-ekonomikalıq rawajlandırıw, ekologiyalıq turaqlılıq, sapalı bilimlendiriw sıyaqlı máselelerde óz-ara pikir alısıw maqsetinde ekspertlik hám ilimiy toparlardıń wákilleri esaplanǵan sırt eldegi watanlaslardıń turaqlı qarım-qatnası kórinisinde “Uz Global Think” forumı, sırt eldegi watanlaslar menen baylanıslar tarawında mámleketlik siyasat Koncepciyasınıń jańa joybarı, akademiyalıq sheńberdegi shaxslar, olardıń ómir jolı, tabısları, Jańa Ózbekstannıń rawajlanıwına xızmet etetuǵın usınıslarınan ibarat maqalalar jaylastırıp barılatuǵın “Who Is Who” joybarı.
Forumda sırt eldegi watanlaslarımızdıń Ózbekstandı rawajlandırıwdaǵı roli hám birge islesiwdiń áhmiyetli máseleleri dodalandı. Watanlaslardıń jáne de awızbirshiligin támiyinlew, túrli áwlad wákilleri – studentler, isbilermenler, ilimpazlar hám basqalardıń Watan menen baylanısın jáne de kúsheytiw máselelerinde pikirler, usınıslar ortaǵa taslandı.
Forum sheńberinde hár qıylı baǵdarlarda arnawlı sektor májilisleri de bolıp ótti. Sonıń ishinde, “Bilimlendiriw hám innovaciyalıq ekonomika” bóliminde jaslar potencialı hám bilimlendiriw sistemasında birge islesiw máseleleri, “Sanlı texnologiyalar hám integraciyalasıw” bóliminde málimleme texnologiyaları tarawındaǵı jańalıqlar, sanlı xızmetler hám transmilliy integraciya imkaniyatları kórip shıǵıldı. Sociallıq rawajlanıw hám mádeniyat baǵdarında milliy miyrastı qásterlep saqlaw, mádeniy baylanıslardı keńeytiw, jámiyette ózbeklerdiń imidjin arttırıw boyınsha pikir alısıldı.
Sirakuz forumı milliy diplomatiya, ekonomikalıq birge islesiw, mádeniy intellektuallıq quwatlılıqtı birlestirgen áhmiyetli waqıya bolıp tabıladı. Forum sheńberinde tek ǵana Nyu-York emes, al AQShtaǵı abıraylı joqarı oqıw orınlarınan biri esaplanǵan Sirakuz universiteti menen birgelikte studentler almasıwı, birgeliktegi ilimiy izertlewler, professorlardıń bayanatların jolǵa qoyıw máseleleri dodalandı. Bul jaslarımız ushın úlken imkaniyat, Watanımızdıń bilimlendiriw sisteması ushın bolsa tájiriybe hám innovaciyalar dáregi bolıp xızmet etedi.
Forum tek ǵana diaspora turmısın birlestirip qoymastan, al Ózbekstannıń xalıqaralıq siyasiy abırayın bekkemlewde áhmiyetli qádem boldı.

ÓzA