Watan haqqındaǵı qosıqlar qanday bolıwı kerek? Olar zamanagóy, yoshlı, zawıqlı, tartımlı bolıwı zárúrligin dáwirdiń ózi kórsetpekte.

Paytaxtımızdaǵı “Renessans” kino úyinde Respublikalıq Ruwxıylıq hám aǵartıwshılıq orayı tárepinen tayarlanǵan “Watan” atamasındaǵı qosıqlar toplamınıń prezentaciyası bolıp ótti.
Usı múnásibet penen shólkemlestirilgen ilajǵa keń jámiyetshilik, jazıwshı hám shayırlar, kompozitorlar, oqıtıwshılar, student-jaslar mirát etildi.
Ózbekstan Respublikası Prezidentiniń 2025-jıl 10-iyuldegi “Ózbekstan Respublikası mámleketlik ǵárezsizliginiń otız tórt jıllıq bayramına tayarlıq kóriw hám onı ótkeriw haqqında”ǵı qararınıń orınlanıwın támiyinlew maqsetinde Respublikalıq Ruwxıylıq hám aǵartıwshılıq orayı tárepinen “Watan” atamasında qosıqlar toplamı tayarlandı.
Bul joybardan gózlengen tiykarǵı maqset xalqımız arasında watansúyiwshilik, jańa milliy ruwxıylıq hám ulıwma milliy awızbirshilikti jırlaytuǵın, zamanagóy usıldaǵı, jaslar qálbine jaqın muzıkalıq shıǵarmalardı jaratıwǵa jaqınnan járdemlesiwden ibarat.
Prezentaciyada Respublikalıq Ruwxıylıq hám aǵartıwshılıq orayınıń basshısı Otabek Hasanov elimizde jaslardıń mánawiyatın arttırıw máselesi tiyisli strukturalarǵa úlken juwapkershilik júkleytuǵının atap ótti.
– Maqsetimiz bir – elimiz jaslarınıń jáne de máripatlı bolıwına úles qosıw, – dedi Respublikalıq Ruwxıylıq hám aǵartıwshılıq orayınıń basshısı Otabek Hasanov. Insannıń ruwxıy dúnyasına, onıń ruwxıyatına eń tez tásir kórsetetuǵın qural bul kórkem óner. “Watan” atlı qosıqlar toplamı ózinde kóplegen qosıqlardı jámlegen. Bul toplamdı jaratıwda Ózbekstan Respublikası Prezidenti Administraciyası, túrli ministrlikler hám uyımlar, dóretiwshilik shólkemler menen birgelikte miynet ettik. Elimiz dóretiwshileriniń watansúyiwshi, xalıqshıl ekeni usı processte jáne bir márte kórindi. Ayırım qatnasıwshılar hátteki AQShtan jetip kelip, onıń júzege keliwine óz úlesin qostı. Bul qosıqlar toplamı shın mánisinde “Watan ushın, millet ushın, xalıq ushın!” degen ullı ideyanı ózinde jámlegeni menen dıqqatqa ılayıq.
“Watan” toplamınan Xayriniso Akbarova hám Qosim Muinovtıń “Ana jerim”, Davlatshoh Hamroqulovtıń “Millatim”, Mirshod Elovtıń “Batırlar qosıǵı”, “Setora” toparınıń “Ózbekstan – táǵdirim”, sonday-aq, Shahnoz, Farrux Fazel, Jenisbek Piyazov hám “Setora” toparınıń atqarıwındaǵı “Alǵa, Ózbekstan” qosıqları orın alǵan.
Bul joybarda shayırlar Muhammad Siddiq, Nurmuhammad Zoir, Farrux Jabborbek, Shahnoz jáne kompozitorlar Qosim Muinov, Hamidjon Munirov, Wktamxon Hakimbek sıyaqlı dóretiwshiler belsene qatnastı.

Nazokat Usmonova, ÓzAnıń xabarshısı