Prezident Shavkat Mirziyoev 25-avgust kúni Samarqandqa keldi.

Dástúrge muwapıq, dáslep Imam Buxariy mavzoleyi zıyarat etildi. Quran oqılıp, pátiya etildi.
Mámleketimiz basshısı bul jerdegi dóretiwshilik jumıslardı kózden ótkerdi.
Ullı muhaddis babamızǵa pútkil islam dúnyasında húrmet joqarı, onıń maqbarasın kóriw tilegindegi insanlar kóp. Sonıń ushın zıyaratshılarǵa sharayatlardı jáne de keńeytiw maqsetinde bul jerde úlken kompleks qurılmaqta.
Zıyarat etiw ornınıń ulıwma maydanı 44 gektarǵa shekem keńeytilgen. Úlken maqbara, 10 mıń adamǵa mólsherlengen meshit hám administraciya imaratı qurıp pitkerilgen. Komplekstiń tórt múyeshindegi 75 metrlik minaralar oǵan sawlat baǵıshlaǵan.
Házirgi waqıtta pardozlaw jumısları alıp barılmaqta. Portal hám áywan diywallarına “Sahihi Buxariy”den hádisler jazılmaqta.
Prezidentimiz bul kompleks tek zıyarat etiw emes, ilim-aǵartıwshılıq, tárbiya hám ibrat orayı bolıwı kerek ekenligin atap ótti. Imam Buxariydiń ullı izlenisleri, bilimi hám kamalı bul jerge keliwshiler, ásirese, jaslar ushın jaqsı úlgi bolatuǵını atap ótildi.
Usı maqsette jańa komplekste innovaciyalıq muzey de shólkemlestirilmekte. Ol islam dúnyasında muhaddisler sultanı dep tán alınǵan Imam Buxariydiń ómiri hám ilimiy miyrası, islam aǵartıwshılıǵınıń rawajlanıwına qosqan úlesin kórsetedi. Sonday-aq, muzeyde Quranı kárimde atları tilge alınǵan 25 payǵambardıń tariyxı, Muhammed áleyhissalamnıń shejiresi, onıń Mekke hám Madinadaǵı ómiri, hádislerdiń jıynalıwı hám jazılıwı haqqındaǵı maǵlıwmatlar jaylastırıladı.
Zıyarat etiw ornı átirapında miymanxana hám basqa da xızmet kórsetiw imaratlarınıń qurılıs jumısları da juwmaqlawshı basqıshqa kirgen.
Mámleketimiz basshısı qurılıstı sapalı orınlaw, zıyaratshılarǵa qolaylıqlardı keńeytiw, kompleks átirapında jasıl maydanlardı kóbeytiw boyınsha kórsetpeler berdi.

ÓzA