Ózbekstan Respublikası Awıl xojalıǵı ministrligi janındaǵı Ósimlikler karantini hám qorǵaw agentliginiń tiyisli buyrıǵına tiykarlanıp respublikamızda ǵawasha hám tákirarıy eginlerdiń (másh, lobiya hám basqalar) tiykarǵı zıyankesleri, atap aytqanda, ǵawasha qurtına qarsı nátiyjeli ilajlardı kóriw maqsetinde 2025-jıldıń 18-avgustınan 6-sentyabrine shekem “Áhmiyetli 20 kúnlik” járiyalanǵan edi.

Usı ilajlar sheńberinde ǵawasha hám tákirarıy egislik maydanlarında úzliksiz monitoring hám fitosanitariyalıq atız qadaǵalawı alıp barılıp, agentliktiń “Agrokwmakchi” mobil qosımshası arqalı “Atız dápteri”niń júrgiziliwi jolǵa qoyıldı.

Sonday-aq, hár eki gektar maydanǵa bir-birewden feromon tutqısh ornatılıp, onıń nátiyjeleri tiykarında zıyankesler qadaǵalanbaqta.

“Áhmiyetli 20 kúnlik” ilajları Taqıyatas rayonında da ámelge asırılıp, zıyankeslerge qarsı biologiyalıq qorǵaw quralları belgilengen normalarda qollanılıwı boyınsha qatań qadaǵalaw ornatıldı. Eger ǵawasha qurtınıń tarqalıwı ekonomikalıq zıyan muǵdarı ólsheminen (EZMÓ) assa, zárúr jaǵdaylarda ximiyalıq qayta islew ótkeriliwi belgilengen. Atap ótiw kerek, ximiyalıq qayta islewden keminde 3 kún aldın aymaqtaǵı pal hárreshiler eskertiledi.

– Agroklasterler, fermer hám diyqan xojalıqlarınıń basshıları jáne qıytaq jer iyelerinen ǵawasha hám tákirarıy eginlerde zıyankes anıqlanǵanda, bul haqqında dárhal Ósimlikler karantini hám qorǵaw agentligine xabar beriw talap etiledi. Eger fitosanitariyalıq talaplar óz waqtında orınlanbaǵan jaǵdayda, nızam hújjetlerinde belgilengen tártipte shara ilajları kóriledi,-deydi agentliktiń fitosanitariyalıq qadaǵalaw hám monitoring bóliminiń baslıǵı A.Elmuratov.

“Áhmiyetli 20 kúnlik” ilajları respublikamız boylap barlıq rayonlarda nátiyjeli dawam etpekte.

Qaraqalpaqstan xabar agentligi