Ózbekstan Respublikası mámleketlik ǵárezsizliginiń 34 jıllıǵı múnásibeti menen “Watan ushın, millet ushın, xalıq ushın” súreni astında “Ulıwma milliy tilekleslik festivalı” shólkemlestirildi. Usı festival sheńberinde ruwxıy-aǵartıwshılıq ortalıqtı bekkemlewge qaratılǵan Ruwxıylıq festivalı Ellikqala rayonında bolıp ótti.

Festival Ózbekstan Respublikası Bas ministriniń 2025-jıl 31-iyuldegi 63-sanlı protokolınıń orınlanıwın támiyinlew maqsetinde ótkerildi. Onda túrli baǵdardaǵı joybarlar ámelge asırıldı.
Jaslardı watansúyiwshilik ruwxında tárbiyalawǵa qaratılǵan “Shijoat Vatanparvarlik” joybarı, isbilermen jaslar menen “Abadan turmısqa dáslepki qádem” ushırasıwları, sport jarısların qamtıp alǵan “Awızbirshilik kubogi” ilajları shólkemlestirildi. Sonday-aq, balalarǵa baǵıshlanǵan “Baxıtlı balalıq” joybarı, kitapqumarlıqtı xoshametlewshi “Kitap marafonı” hám “Bir kitap – bir ómir” akciyaları ótkerildi, – dep maǵlıwmat beredi rayon hákimliginiń Málimleme xızmeti bólimi.
Ádebiyat hám dóretiwshilerdi birlestiretuǵın “Mushaira aqshamları” da festival sheńberinen orın aldı. Onda jazıwshı hám shayırlar óz dóretiwshilik úlgilerin usındı.
Festival jámiyette milliy tilekleslik hám watanǵa sadıqlıq sezimin bekkemlewge xızmet etetuǵın áhmiyetli ruwxıy platforma boldı.

Qaraqalpaqstan xabar agentligi