Bul haqqında Prezidentimiz Shavkat Mirziyoevtiń isbilermenler menen ashıqtan-ashıq sóylesiwinde atap ótildi.

Kelesi úsh jılda miymanxana hám turizm orınların shólkemlestiriw ushın jámi 5 mıń gektar jer aukcionǵa shıǵarıladı.

Onda miymanxana qurmaqshı bolǵan isbilermenlerden jerlerdi satıp alıw ushın tólem óndirilmeydi. Sonıń esabınan mámleket usı summa menen joybarǵa úles qosıwshı bolıp kiredi.
Isbilermenler 10 jıl ishinde qálegen waqıtta bul úlesti qayta satıp alıwı múmkin boladı. Eger isbilermen jerdiń bahasın aldınnan tóleymen dese, 20 procent shegirme beriledi.
Miymanxana qurıw ushın 7 jıl múddetke 2 jıllıq jeńilletilgen dáwir menen wálayatlar orayı hám turizmge qánigelesken 36 rayonda – 30 milliard sumǵa shekem, basqa aymaqlarda bolsa 10 milliard sumǵa shekem jeńilletilgen kredit ajıratıladı.
Kóp isbilermenler mámleketlik obektler hám jeke menshik imaratlardı satıp alıp, miymanxanaǵa aylandırmaqta. Endi jańa miymanxana ushın názerde tutılǵan subsidiya olarǵa da beriledi.
Házir miymanxana iyeleri hár bir turist ushın kúnine 62 mıń sumǵa shekem turistlik jıyım tólewge májbúr. Endi Tashkent qalası, wálayatlar orayı hám iri turistlik aymaqlardan tısqarı qandayda bir jerdegi miymanxana bul jıyımdı tólemeydi.

ÓzA