«Ózbekstan Respublikası Prezidentiniń ayırım qararlarına máhállelerde jınayatshılıqtıń waqtında aldın alıw sistemasınıń nátiyjeliligin jáne de arttırıwǵa qaratılǵan ózgerisler hám qosımshalar kirgiziw haqqında»ǵı Prezident qararı qabıl etildi.

Oǵan muwapıq, kriminogen jaǵdayı quramalı máhálleler jasalma intellektte isleytuǵın arnawlı programmalıq támiynatqa integraciyalanǵan zamanagóy baqlaw kameraları menen tolıq qamtıp alınadı.
Usı jıldıń aqırına shekem fizikalıq táreplerdiń múlkin texnikalıq qorǵawdıń qamtıp alınıwı 30 procentke, yuridikalıq táreplerdiń múlkin qorǵawdıń qamtıp alıwı 60 procentke jetkeriledi.
Ishki isler uyımlarında joqarı maman kadrlardıń rezervin qáliplestiriw maqsetinde Ishki isler ministrligi Akademiyasında aralıqtan bilimlendiriw túri engiziledi hám bakalavriat baǵdarlaması boyınsha qabıllaw kvotaları basqıshpa-basqısh arttırıp barıladı.
Qarar menen «Kriminogen jaǵdayı quramalı máhállelerde jınayatlardıń aldın alıw boyınsha mánzilli ilajlar» Koncepciyası tastıyıqlandı.
Máhállelerde ayrıqsha shólkemlestiriw-profilaktikalıq ilajlar hám mánzilli ilajlar menen ilimiy-ámeliy processlerdi úylestirgen halda kriminogen jaǵdaydı turaqlastırıw hám qáwipsiz ortalıqtı jaratıw Koncepciyanıń tiykarǵı maqseti esaplanadı.
Koncepciyaǵa bola, rayon (qala) ishki isler uyımı baslıǵı hám prokurordıń xızmet xanası 2025-jıldıń aqırına shekem tikkeley máhállelerde shólkemlestirilip, kúndelikli jumısınıń baslanıwı hám juwmaǵı áne, usı jerde ámelge asırıladı.
Máhállelerde basqıshpa-basqısh máhálle huqıq qorǵaw oraylarınıń jumısı jolǵa qoyıladı.
Sociallıq profilaktika obektleri, ásirese, shańaraq – turmıs sheńberinde huqıqbuzarlıqlarǵa qol uratuǵın shaxslardıń (Jánjelkesh hám kelispewshilikli shańaraqlar) jaǵdayınan májbúriy túrde keminde hár 3 kúnde xabar alıw ámeliyatı jolǵa qoyıladı.
Máhállelerde jınayatshılıqtıń aldın alıw baǵdarında «máhálle jetiligi» tárepinen puqaralar arasında úgit-násiyatlaw jumısların alıp baratuǵın «máhálle úgit-násiyatlawshısı» jámiyetlik toparları shólkemlestiriledi.
Máhálledegi jámiyetlik orınlar, kóp qabatlı turaq jaylar aldında «táshwish» túymeleri ornatıladı.

N.Abduraimova, ÓzA