Bul haqqında Energetika ministrligi málimleme xızmeti xabar berdi. Onda aytılıwınsha, usı jıldıń 17-avgust kúni Kabul qalasında Ózbekstan Respublikası energetika ministri Jwrabek Mirzamahmudov hám Ózbekstan Respublikası Prezidentiniń Awǵanstan boyınsha arnawlı wákili Ismatilla Irgashev Awǵanstan Bas ministriniń ekonomikalıq máseleler boyınsha orınbasarı Molla Abdul Ǵani Barodar menen ushırasıw ótkerdi.

Ushırasıwda eki táreptiń janılǵı-energetika kompaniyalarınıń basshıları hám juwapker xızmetkerleri qatnastı.
Onda atap ótilgenindey, usı jıldıń 3-iyul kúni Ázerbayjan Respublikasınıń Xankendi qalasında Ózbekstan Respublikası Prezidenti Shavkat Mirziyoev hám Molla Abdul Ǵani Barodar arasında bolıp ótken sóylesiw ayrıqsha áhmiyetke iye. Bul ushırasıwda eki tárepleme birge islesiw baylanısların keńeytiw, óz-ara paydalı joybarlardı ámelge asırıw hám birgeliktegi baslamalardı qollap-quwatlaw máselelerine ayrıqsha itibar qaratılǵanı, bul bolsa qatnasıqlardı jańa basqıshqa kóteriw hám strategiyalıq sheriklikti bunnan bılay da bekkemlewge xızmet etetuǵını atap ótildi.
Sóylesiwler dawamında Ózbekstan hám Awǵanstan energetika kompaniyaları arasında tórt iri joybardı ámelge asırıw boyınsha shártnamalarǵa qol qoyıldı. Sonıń ishinde, 500 kVlı “Surxan-Puli-Xumri” elektr uzatıw tarmaǵı 200,6 kilometr aralıqta qurılıp, “Xwja-Alvon” podstanciyası keńeytiledi. Sonday-aq, “Arǵanda” podstanciyası 500/220 kV ǵa shekem keńeytilip, quwatlılıǵı 800 MVA ǵa shekem arttırıladı. Bunnan tısqarı, “Butxak” (Kabul) podstanciyasınan “Shayx Misri” (Nangarxar) podstanciyasına shekem 125 kilometr uzınlıqtaǵı 220 kVlı jańa eki shınjırlı elektr uzatıw tarmaǵı qurıladı. Sonıń menen birge, “Shayx Misri” (Nangarxar) 220 kVlı podstanciyası 2×25 MVA hám 2×40 MVA quwatlılıqta qurıladı.
Tárepler bul joybarlardıń qurılıs jumısların usı jıldıń 6-7-sentyabr kúnleri Kabul qalasında bolıp ótetuǵın Xalıqaralıq energetika konferenciyası sheńberinde baslawǵa kelisip aldı.
Joybarlar 2027-jıldıń birinshi sheregine shekem ámelge asırılıwı belgilengen bolıp, bul Ózbekstan hám Awǵanstan arasında elektr energetikası tarawındaǵı birge islesiw baylanısların jáne de rawajlandırıwǵa xızmet etedi. Sonday-aq, barlıq processlerdi joqarı sapada hám óz waqtında ámelge asırıw, qurılıs jumıslarında jergilikli resurslardan maksimal dárejede paydalanıw úlken áhmiyetke iye ekeni atap ótildi. Energetika tarmaqların modernizaciyalaw, esap-sanaq sistemaların sanlastırıw hám maman kadrlar tayarlaw tarawlarında da birge islesiw baylanısların keńeytiw boyınsha pikir alısıldı.

N.Ziyodullaeva tayyorladi, ÓzA