Aldın Kásiplik awqamı Respublikalıq keńesi Mektepke shekemgi hám mektep bilimlendiriwi ministrligine usı oqıw jılınan baslap V2 sertifikatına iye bolmaǵan shet tilleri muǵallimlerin jumıstan bosatpawdı sorap, usınıs kirgizgen edi.

Bul usınısqa Mektepke shekemgi hám mektep bilimlendiriwi ministrligi tárepinen berilgen juwap xatında aymaqlıq basqarmalar hám sistema shólkemlerine usı oqıw jılınan baslap V2 sertifikatına iye bolmaǵan shet tilleri muǵallimlerin jumıstan bosatıw boyınsha rásmiy kórsetpe berilmegenligi kórsetilgen.
“Miynet kodeksiniń 10-statyasına bola, miynet haqqındaǵı nızamshılıq usı Kodeksten hám jeke tártiptegi miynetke baylanıslı qatnasıqlardı hám olar menen tikkeley baylanıslı bolǵan jámiyetlik qatnasıqlardı tártipke salıwshı basqa da nızamshılıq hújjetlerinen ibarat.
Usı kodekstiń 19-statyasında, xızmetker hám jumıs beriwshi jeke tártiptegi miynetke baylanıslı qatnasıqlardıń subektleri ekenligi belgilengen. Usıǵan muwapıq, Miynet kodeksinde, basqa da nızamlarda názerde tutılǵan tártipte hám shártler tiykarında miynet shártnamasın dúziw, ózgertiw hám biykarlaw tikkeley jeke tártiptegi miynetke baylanıslı qatnasıqlardıń subektleri arasında sheshiliwi kerek,” – delinedi ministrliktiń juwap xatında.
Sonıń menen birge, Mektepke shekemgi hám mektep bilimlendiriwi ministrliginiń usınısına bola, usı jıldıń avgust ayında Joqarı bilimlendiriw, ilim hám innovaciyalar ministrligi janındaǵı Bilim hám mamanlıqlardı bahalaw agentligi tárepinen shet tili muǵallimleri ushın shet tilin biliw dárejesin anıqlaw boyınsha qosımsha test sınaqların shólkemlestiriw ilajları kórilip atırǵanı málim etildi.
Ministrler Kabinetiniń 2021-jıl 19-maydaǵı “Shet tillerin úyreniwdi ǵalaba en jaydırıwdı nátiyjeli shólkemlestiriw ilajları haqqında”ǵı 312-sanlı qararınıń 9-bántine muwapıq, 2025-2026-oqıw jılına shekem ulıwma orta, orta arnawlı hám professional bilimlendiriw mákemelerinde jumıs alıp barıp atırǵan barlıq shet tilleri muǵallimleri keminde B2 dárejedegi milliy yamasa oǵan teńlestirilgen sáykes dárejedegi xalıqaralıq sertifikatqa iye bolıwı kerek ekenligi belgilengen,-dep málimleme beredi xabar.uz saytı.

Qaraqalpaqstan xabar agentligi