Prezident Shavkat Mirziyoev 14-avgust kúni shıǵındılardı qayta islewdi keńeytiw ilajları boyınsha prezentaciya menen tanıstı.

Eldiń abadanlıǵı hám xalıqtıń salamatlıǵında úlken orın tutatuǵın bul tarawǵa zamanagóy processler alıp kirilmekte. Keyingi úsh jılda barlıq dáreklerden 2 trillion sumnan aslam qarjı qaratıldı. Ótken jılı Shıǵındılardı basqarıw hám cirkulyar ekonomikanı rawajlandırıw agentligi shólkemlestirildi.
Shıǵındı kárxanaları ushın 1 mıń 200 jańa texnika alıp berildi. Máhállelerde shıǵındı maydanshaları qurıldı. Toplaw hám tasıp ketiw jaqsılanǵanı nátiyjesinde bul tarmaq ekilemshi shiyki dáregine aylandı.
Aldınları mámleket monopoliyasında bolǵan tarawda isbilermenlikke jol ashılıp, qolaylı biznes ortalıǵı jaratıldı. Sonıń ishinde, sanitar-tazalaw hám shıǵındını qayta islew kárxanaları ushın payda salıǵı hám sociallıq salıq stavkaları 1 procent etip belgilendi. Shetten alıp kelinetuǵın texnika hám úskeneler import bajısınan azat etildi. Nátiyjede 200 ge shamalas sanitar-tazalaw hám 290 shıǵındını qayta islew kárxanaları ashıldı.
Prezentaciyada juwapkerler tarawdaǵı joybarlardıń barısı hám gezektegi rejeler haqqında málimleme berdi.
Elimizde jılına 14 million tonna turmıslıq shıǵındı payda boladı. Biraq, olardı qayta islew dárejesi tómen. Sońǵı jıllardaǵı joybarlar nátiyjesinde bul endi 5 procentke jetti.
Shıǵındını jaǵıw arqalı energiya islep shıǵarıw joybarları qollap-quwatlanbaqta. Qıtaylı investorlar 6 wálayatta usınday zavodlar qurmaqta. Mámleket shıǵındı utilizaciyası ushın olarǵa tólew menen birge, payda bolǵan energiyanı satıp alıw boyınsha da minnetleme almaqta.
Jaqında Tashkent qalasında medicinalıq shıǵındını jaǵıp, ıssılıq alatuǵın eki kárxana iske qosıldı. Jáne Samarqandta 2, qalǵan aymaqlarda birewden usınday zavodlardıń qurılısı mólsherlengen.
Turmıslıq shıǵındılardıń tórtten biri qaǵaz, plastik, rezina, shiyshe, toqımashılıq qaldıqlarına tuwra keledi. Olardı qayta islep, 1 trillion sumlıq ónim alıw múmkin ekenligi aytıldı. Bunnan tısqarı, elimizde qayta islenbeytuǵın qurılıs, ximiya, elektron, texnikalıq hám sanaat mayları boyınsha úlken rezerv bar ekenligi kórsetip ótildi.
Shıǵındını tasıp ketiw xızmetleri xalıqtı razı etetuǵın dárejede bolıwı kerek ekenligi atap ótildi. Sonlıqtan máhállege shıǵındı texnikasınıń keliw waqtı hám háreketin onlayn kóriw imkaniyatın jaratıw wazıypası qoyıldı.
Sociallıq mákemeler hám máhállelerdi shıǵındı konteynerleri menen tolıq támiyinlew boyınsha eki jıllıq baǵdarlama islep shıǵılatuǵını belgilendi. Xalıqta ekologiyalıq mádeniyattı baqsha hám mektepten baslap qáliplestiriw áhmiyetli ekenligi atap ótildi.

ÓzA