Shokolad – bul pútkil dúnya boylap súysinip jelinetuǵın mazalı zat bolıp, ol tek ǵana dámi menen emes, al densawlıq ushın paydalı qásiyetleri menen de belgili. Shokolad kakao tereginiń miywesinen alınatuǵın kakao lobiyalarınan tayarlanadı hám áyyemgi zamanlardan berli adamzatqa tanıs. Shokoladtıń bir neshe belgili túrleri bar.

Qara shokolad quramında kóp muǵdarda kakao bolıp, kemirek qumsheker qosıladı. Bul shokolad túri insan organizmi ushın paydalı bolǵan túrlerden bolıp, júrektiń islewin jaqsılaydı. Shokolad jew procesinde ádettegi emes dám sebepli bul túrdi súysinip jeytuǵınlar da az emes.
Sútli shokolad – shokolad hám sút aralaspasınan tayarlanǵan bolıp, bul shokolad túri kópshilik ushın súykimli hám tanıs.
Aq shokolad bolsa kakos mayı, qumsheker hám sút tiykarında tayarlanadı, biraq quramında kakao bolmaydı. Bul túr kóbinese mazalı zatlardı bezew ushın da paydalanıladı.
Shokolad kópshiliktiń awqatlanıw racionınan orın alǵan hám dúnya kóleminde eksport hám import máseleleri jetekshi orınlarda turadı. Milliy statistika komitetiniń maǵlıwmatlarına bola, 2025-jıldıń birinshi shereginde Ózbekstan 29 mámleketten bahası 31,4 million AQSh dollarına teń bolǵan 9,9 mıń tonna shokolad hám shokolad ónimlerin import etken. Bul ónimniń importın mámleketler kesiminde esaplasaq, eń úlken úles, yaǵnıy 7 mıń 528 tonna Rossiya aymaǵına tuwra keledi. Sonday-aq, Niderlandiya, Ukraina, Qazaqstan, Franciya sıyaqlı mámleketlerden shokolad ónimleri úlken muǵdarda import etilgen.
Ilimpazlar tárepinen shokoladtıń insan organizmi ushın bir neshe zıyanlı tárepleri anıqlanǵan. Biraq normaǵa ámel etilse, shokoladtıń qáwiplilik dárejesi derlik joǵaladı. Bul mazalı ónim tek ǵana muhabbat hám mehir tımsalı emes, al, mádeniyat, tariyx hám zawıq dáregi bolıp esaplanadı. Ol insannıń keypiyatın kóteredi, quwat beredi hám turmıstı jáne de jaǵımlı etedi. Biraq densawlıqtı umıtpay, onı óz ornında paydalanıw da áhmiyetli.

Dildora DWSMATOVA, ÓzA