Mámleketimizde sońǵı jıllarda xalıqtıń huqıqıy máplerin qorǵaw, ásirese, turaq jay hám múlk máselelerinde ádillikti ornatıw boyınsha keń kólemli jumıslar ámelge asırılmaqta.

Prezidentimizdiń baslaması menen Qaraqalpaqstan Respublikası ushın 119-sanlı arnawlı Párman qabıl etilgen bolıp, oǵan tiykarlanıp qala hám rayonlarda jámi 27 mıń 590 kadastr hújjetleri joq turaq jaylarǵa iyelik etiw huqıqı berildi. Bul turaq jaylarǵa kadastr pasportları tayarlanıp, mámleketlik dizimnen ótkerildi. Bul baslama xalıqtıń jıllar dawamında kútken mashqalasınıń sheshiliwine xızmet etti.
Bul iygilikli jumıslar izbe-iz dawam ettirilip, 2024-jıl 5-avgust kúni Ózbekstan Respublikasınıń “Ózbasımshalıq penen iyelep alınǵan jer uchastkalarına hám olarda qurılǵan imaratlar menen obektlerge bolǵan huqıqlardı tán alıw haqqında”ǵı Nızamı qabıl etildi hám 2024-jıl 8-noyabrden kúshke kirdi.
Usı Nızamnıń 19-statyasına muwapıq Qaraqalpaqstan Respublikası Joqarǵı Keńesine, xalıq deputatları wálayatlar hám Tashkent qalalıq Keńeslerine jiberilgen maǵlıwmatlar hám hújjetler úsh ay ishinde Qaraqalpaqstan Respublikası Joqarǵı Keńesiniń, xalıq deputatları wálayatlar hám Tashkent qalalıq Keńesleriniń sessiyalarında dodalanıwı jáne jer uchastkasına bolǵan ijara huqıqın hám onda qurılǵan imaratqa bolǵan múlk huqıqın tán alıw haqqındaǵı qararlarınıń qabıl etiliwi belgilep qoyılǵan.
Sonnan kelip shıǵıp, Qaraqalpaqstan Respublikası Joqarǵı Keńesiniń jaqında ótkerilgen besinshi sessiyasında ózbasımshalıq penen iyelep alınǵan jer uchastkaları hám olarda qurılǵan imaratlar menen obektlerge bolǵan huqıqlardı tán alıw máselesi de dodalandı.
Qaraqalpaqstan Respublikası Joqarǵı Keńesiniń bul retki sessiyasında 267 puqaranıń jer uchastkalarına ijara hám turaq jaylarǵa bolǵan múlk huqıqların tán alıw boyınsha qarar qabıl etildi. Usı tárizde búgingi kúnge shekem joqarıda keltirilgen Nızam tiykarında Qaraqalpaqstan Respublikası Joqarǵı Keńesiniń sessiya qararları menen jámi 291 puqaranıń múlk huqıqın tán alıw boyınsha dizim tastıyıqlandı.
Álbette, Joqarǵı Keńes deputatları usı nızam sheńberinde ámelge asırılıp atırǵan jumıslar menen tanısıp barmaqta. Kadastr agentligi Qaraqalpaqstan Respublikası basqarması baslıǵı I.Tleuovtıń bul boyınsha bergen maǵlıwmatlarına bola, kadastr xızmetkerleri tárepinen Qaraqalpaqstan Respublikasında 41 mıń 911 kóshpes múlk obekti dizimnen ótkerilgen. Sonnan usı jıldıń 24-iyul kúngi statistikalıq maǵlıwmatqa bola, 14 mıń 598 obekt “tán alıw” málimleme sistemasına kirgizildi.
Házirgi waqıtta 12 mıń 502 obekt hújjetleri boyınsha dodalaw procesinde bolıp, bul jumıslar izbe-iz dawam ettirilmekte. Sonday-aq, 1 mıń 304 obekt haqqındaǵı maǵlıwmatlar “kadastr.uz” saytında jáne mákan puqaralar jıyınları imaratlarındaǵı afishalarda járiyalandı. 305 obekt Ádillik uyımları tárepinen úyrenilip atırǵan bolsa, 209 kóshpes múlk qayta kórip shıǵılmaqta. Házirgi waqıtta 141 obekt boyınsha iyeleri nızamda belgilengen bir mártelik tólemlerdi ámelge asırıwı kútilmekte. Sonıń menen birge, 14 kóshpes múlkke baylanıslı múlk huqıqların tán alıw boyınsha xalıq deputatları rayonlıq hám qalalıq keńesleriniń qararları qabıl etiw ushın kirgizilgen.
Álbette, bul processler Prezidentimizdiń basshılıǵında ámelge asırılıp atırǵan reformalardıń ámeliy kórinisi bolıp esaplanadı. Bul process tek ǵana xalıqtıń huqıqıy qorǵalıwın támiyinlep qoymastan, al adamlarımızda mámleketke bolǵan isenimdi jáne de bekkemleydi. Hár bir puqara óz úyi, óz múlkine tolıq nızamlı tiykarda iyelik etiwi – insan qádiri ulıǵlanǵan jámiyettiń baslı ólshemi bolıp esaplanadı.

Ǵulamjan Eshniyazov,
Qaraqalpaqstan Respublikası Joqarǵı Keńesiniń deputatı.
Qaraqalpaqstan xabar agentligi