Prezident Shavkat Mirziyoev Buxara wálayatında reformalardıń nátiyjeliligin hám jańa joybarlardı dodalaw boyınsha májilis ótkerdi.

Burın bul aymaq ekonomikası sanawlı tarmaqlar menen sheklengen edi. Keyingi segiz jılda wálayatqa 8 milliard dollardan aslam investiciya tartılıp, ekonomika quramı keńeydi. Tek ǵana sanaat tarawında 6 mıń jańa kárxana ashıldı. Sanaat ónimlerin islep shıǵarıw kólemi 6 eseden zıyat arttı.
Turizm infrastrukturası jaqsılanıp, jańa orınlar shólkemlestirildi. Abıraylı miymanxana brendleri kirip keldi. Jıllıq turistlerdiń sanı 1 million 700 mıńǵa jetti.
Ózbekstan Prezidentiniń 2024-jıl 5-dekabrdegi qararı menen Buxara wálayatında sanaat hám xızmet kórsetiw tarawın rawajlandırıw boyınsha qosımsha ilajlar belgilengen edi. Nátiyjede usı jıldıń 6 ayında sanaat ónimlerin islep shıǵarıw 7,3 procentke arttı. 198 jańa sanaat kárxanası shólkemlestirildi. Jalpı aymaqlıq ónimniń kólemi 6,4 procentke ósti.
Mámleketimiz basshısınıń baslamasına muwapıq dúzilgen “Reformalar shtabı” Buxarada da qosımsha imkaniyatlardı júzege shıǵarmaqta. Prezentaciyada juwapkerler mine, usınday jańa joybarlar haqqında málimleme berdi.
Mısalı, túrkiyalı isbilermenler Peshku rayonında grafit qazıp alıw hám qayta islewge qızıǵıwshılıq bildirgen. Vetnam kompaniyası zamanagóy turaq jay, Hindstan kárxanası xirurgiya orayın qurıwdı rejelestirgen. 217 gektar maydanda 260 joybardı ámelge asırıp, 10 mıńnan aslam jańa jumıs ornın jaratıw mólsherlengen.
Ulıwma, wálayatta 1 milliard 700 million dollarlıq 21 jańa joybar qáliplestirilgen. Olardıń nátiyjesinde 32 mıń jumıs ornı, 180 million dollarlıq eksport imkaniyatınıń ashılıwı názerde tutılǵan.
Prezidentimiz aymaq ekonomikasın rawajlandırıw hám xalıqtıń bántligin támiyinlew boyınsha qosımsha imkaniyatlardı kórsetip ótti.
Atap aytqanda, Peshku rayonında xalıqqa ijaraǵa berilgen jerlerde arzan ıssıxanalar qurılıp, eksportqa qolaylı eginler jetistiriw jolǵa qoyılǵan. Bul tájiriybeni ǵalaba en jaydırıp, wálayat boyınsha qosımsha 5 mıń shańaraqta usınday ıssıxanalar shólkemlestiriw wazıypası qoyıldı.
Shofirkon, Ǵijduwan, Peshku hám Buxara rayonlarındaǵı 10 mıń gektarda júzim, Vabkent, Ǵijduwan,, Jandar, Romitan hám Kogonda 5 mıń gektarda erik, chereshnya, ánjir sıyaqlı eksportqa qolaylı miywe baǵların jaratıw boyınsha tapsırma berildi.
Buxaranıń áyyemgi zıyarat orınları belgili. Biraq turistlerdi kóp waqıt alıp qalatuǵın iri kompleksler joq. Sırt elli investorlardı tartıp, sawda hám sayamanlı park ashıw zárúr ekenligi kórsetip ótildi.
Jáne bir úlken baǵdar – sanaat. Wálayatta 2 iri neft-gaz kárxanası bar, jáne birewi qurılmaqta, 10 iri quyash hám samal stanciyalarınıń qurılısı jedellesken. Bul kompleksler átirapında kishi kárxanalardı jaylastırıp, investiciya, sanaat hám eksport kólemin arttırıw múmkin ekenligi aytıldı.
Buxara wálayatı hám rayon hákimleri xalıq ushın dáramat dáreklerin kóbeytip, kámbaǵallıq hám jumıssızlıqtı azaytıw boyınsha rejelerin bildirdi.

ÓzA