Ózbekstan Respublikası Prezidenti Shavkat Mirziyoev 12-avgust kúni Hindstan Respublikası Bas ministri Narendra Modi menen telefon arqalı sóylesti.

Sóylesiw aldınan mámleketimiz basshısı Bas ministr hám dos Hindstan xalqın jaqınlasıp kiyatırǵan milliy bayram – mámlekettiń Ǵárezsizlik kúni menen qızǵın qutlıqlap, tınıshlıq-tatıwlıq, abadanlıq hám rawajlanıw tiledi.
Ózbekstan-Hindstan strategiyalıq sheriklik hám kóp táreplemeli birge islesiw qatnasıqların jáne de rawajlandırıwdıń áhmiyetli máseleleri kórip shıǵıldı.
Erisilgen kelisimlerge muwapıq ámeliy birge islesiw jedel rawajlanıp atırǵanı, túrli dárejelerde jedel hám nátiyjeli sóylesiwler dawam etip atırǵanı úlken qanaatlanıwshılıq penen atap ótildi.
Usı jıldıń basınan tovar almasıw 60 procentke arttı, 40 qa shamalas jańa birgeliktegi kárxana hám kooperaciya joybarları iske qosıldı. Hindstannıń jetekshi kompaniyaları menen ámelge asırılıp atırǵan perspektivalı joybarlardıń házirgi portfeli eki milliard dollarǵa jetti. Ózbekstanda Hindstan universitetleriniń tórt filialı tabıslı jumıs alıp barmaqta.
Jetekshiler farmacevtika hám ximiya sanaatı, sanlı ekonomika, energetika, kánshilik, awıl xojalıǵı, qurılıs, turizm hám basqa da baǵdarlarda kooperaciya joybarların alǵa qoyıw hám ámelge asırıwǵa ayrıqsha itibar qarattı.
“Arqa-Qubla” koridorı sheńberinde nátiyjeli transport-tranzit jónelislerin rawajlandırıw máseleleri dodalandı.
Húkimetleraralıq komissiyanıń gezektegi májilisin Tashkent qalasında nátiyjeli ótkeriw zárúr ekenligi atap ótildi. Mádeniyat hám kino kúnlerin óz-ara shólkemlestiriw, aymaqlar dárejesinde almasıwlardı jedellestiriw usınıs etildi.
Ózbekstan Prezidenti hám Hindstan Bas ministri regionallıq kún tártibi boyınsha da pikir alısıp, bolajaq joqarı dárejedegi ilajlardıń rejesin kórip shıqtı.

ÓzA