Hár qanday jámiyettiń rawajlanıwı bárinen burın miynet súygish insanlar arqalı júzege shıǵadı. Sonday insanlar bar, olardıń jumısı tek ǵana shańaraǵı ushın emes, al jámiyet ushın da paydalı.

Ámiwdárya rayonı CHaykól awılında óziniń óneri hám miyneti menen tanılǵan Bibirobiya Usmanovanıń ismi búgin kópshilikke tanıs. Onıń gúlshilik tarawındaǵı kóp jıllıq tájiriybesi tek ǵana óziniń shańaraǵı emes, al pútkil máhálleniń turmısına unamlı tásir etip kelmekte. Gúl ósiriw arqalı tek ǵana ekonomikalıq dáramat tabıw emes, al qorshaǵan ortalıqtı gózzallandırıw, abadanlastırıw múmkin ekenligin ol óz jumısında ámelde dálillep bergen.
Onıń gúlleri tek ǵana kózdi quwandırıp qoymastan, al hár túrliligi menen de ajıralıp turadı. Onıń baǵında ushırasatuǵın túrler arasında xrizantema, túrk gvozdikası, adonis, situs, seren, liliya hám segiz túrdegi átirgúller bar. Sonday-aq, miyweli terek nálleri hám toǵız túrdegi júzim sortların da tárbiyalap kelmekte. Bul ónimler tek awıl xalqı emes, al rayon bazarlarında da úlken talapqa iye.
Pidayı miynetleriniń nátiyjesi sıpatında Bibirobiya Usmonova “Ibratlı hayal” kókirek belgisi menen sıylıqlanǵan. Onıń mehri hám tártibi shańaraq aǵzalarına da ilham dáregi bolǵan. Bunı onıń qızı Dilrabo Orazımbetova da anasınıń izinen barıp, “Úmit ushqını” kókirek belgisi menen sıylıqlanǵanı menen kóriw múmkin.
Jergilikli xalıq ushın bunday insanlar úlgi bolıp xızmet etedi. Olar arqalı dástúriy ónerler saqlanıp qaladı, jaslar órnek aladı. Hár bir máhállede usınday miynetkesh, keńpeyil hám ullı insanlar bar eken, jámiyettiń rawajlanıwı kepillengen, dep aytıw múmkin.

Qaraqalpaqstan xabar agentligi