Búgin ÓzLiDeP frakciyasınıń gezektegi májilisi bolıp ótti.

Onda dáslep mámleketimiz basshısınıń 5-avgust kúni Túrkmenbashı qalasındaǵı “Avaza” milliy turizm aymaǵında bolıp ótken BMShtıń Teńizge shıǵıw imkaniyatı bolmaǵan rawajlanıp atırǵan mámleketler boyınsha úshinshi konferenciyasında qatnasıwı hám onda alǵa qoyılǵan usınıs-baslamalardıń regionımız hám mámleketimizdiń rawajlanıwındaǵı áhmiyeti haqqında sóz boldı.
Atap ótilgenindey, Prezidentimiz xalıqaralıq transport koridorları hám infrastrukturanı jedel rawajlandırıw tiykarǵı baǵdar ekenin atap ótti. Tiykarǵı joybarlardan biri Ózbekstan – Awǵanstan – Pakistan temir jolınıń qurılısı bolıp esaplanadı. Onıń Qıtay – Qırǵızstan – Ózbekstan magistralı menen baylanısıwı jańa sawda-ekonomikalıq mákan ushın tiykar jaratadı hám regionnıń global logistikadaǵı rolin kúsheytedi.
Forum kelisimlerin ámelge asırıw barlıq mámleketlerdiń geografiyalıq ózgesheliklerine qaramastan, máplerine juwap beretuǵın dúnya kólemindegi ádil, turaqlı hám inklyuziv sistemanı qáliplestiriwge járdem beretuǵını atap ótildi.
Bunnan soń frakciya májilisinde “Ózbekstan – 2030” strategiyasın “Qorshaǵan ortalıqtı qorǵaw hám “jasıl” ekonomika jılı”nda ámelge asırıwǵa baylanıslı mámleketlik baǵdarlamanıń 2025-jıldıń birinshi yarım jıllıǵında orınlanıwı boyınsha esabat jáne bir qatar nızam joybarları qızǵın dodalandı.
Atap aytqanda, “Licenziyalaw, ruqsat beriw hám xabardar etiw tártip-qaǵıydaları haqqında”ǵı Ózbekstan Respublikası Nızamına Ózbekstan Respublikasında elektron kommerciya tarawın jetilistiriwge qaratılǵan qosımshalar kirgiziw haqqında”ǵı nızam joybarı kórip shıǵıldı.
Atap ótilgenindey, bul nızam joybarı elektron kommerciya operatorlarınıń jumısın baslaǵanı yamasa tamamlaǵanı haqqında xabardar etiw tártibi menen baylanıslı nızamshılıqtaǵı boslıqlardı saplastıradı.
Sonday-aq, elektron kommerciyanı rawajlandırıw boyınsha qosımsha nızam hújjetlerin sońǵı ózgerislerge muwapıqlastırıwǵa járdem beredi.

Muhtarama Komilova, ÓzA