Prezident Shavkat Mirziyoev jasırın ekonomikaǵa qarsı gúresiw sistemasın jetilistiriw boyınsha usınıslardıń prezentaciyası menen tanıstı.

Burın bizneske joqarı hákimshilik basım hám aralasıw bolǵanı sebepli kópshilik ashıq-aydın islewden qorqatuǵın edi. Sońǵı jıllarda salıq júgin azaytıw, byurokratiyalıq tosqınlıqlardı saplastırıw boyınsha bir qatar jumıslar ámelge asırıldı. Salıq túrleri 13 ten 9 ǵa azaydı, 100 den aslam túrdegi licenziya hám ruqsatnama biykar etildi.
Nátiyjede, baqlanbay atırǵan ekonomika úlesi 2019-jıldaǵı 45-50 procentten házirgi waqıtta 35 procentke tústi. Biraq ele bunı jáne de azaytıw zárúr.
Prezentaciyada bul baǵdardaǵı tiykarǵı wazıypalar dodalandı. Juwapkerler jasırın ekonomikaǵa sebep bolıp atırǵan faktorlar hám olardı saplastırıw ilajları boyınsha málimleme berdi.
Onda eń nátiyjeli jol aldıńǵı texnologiyalar tiykarında jańasha qatnaslardı engiziw ekeni atap ótildi. Máselen, Tashkent qalasında jámiyetlik transport tolıq avtomatlastırılǵan tólemge ótkerilgeni jolawshılar sanı negizinde 30 procentke kóp ekenin kórsetti. Yamasa sanlastırılǵan diyqan hám buyım bazarlarında túsim 2-3 esege artıp atır.
Bunday sistemanı awıl xojalıǵı, qurılıs, transport, sawda hám xızmetler sıyaqlı jasırın ekonomikanıń úlesi joqarı bolǵan tarawlarda da engiziw boyınsha kórsetpeler berildi. Licenziya hám ruqsatnama beriw processleri hám múddetlerin qayta kórip shıǵıp, insan faktorın keskin qısqartıw hám barlıq qádemlerdi tolıq sanlastırıw wazıypası qoyıldı. Isbilermenler kóp dus keletuǵın salıq, bank, bajıxana, kommunal, sertifikatlaw sıyaqlı tarawlarda korrupciyaǵa jol ashıp atırǵan faktorlarǵa shek qoyıw zárúr ekenligi aytıldı.
Elektron tólemlerdiń rawajlanǵanı xalıqqa keńnen qolaylıq jaratpaqta. Bul jasırın ekonomikanı qısqartıwda da qolaylı qural bolıp tabıladı. Bunıń ushın naq pulsız esap-sanaqlardı xoshametlew, tólem sisteması operatorların kóbeytiw áhmiyetli ekenligi atap ótildi.
Mámleketimiz basshısı tek ǵana qadaǵalawdı kúsheytiw menen jasırın ekonomikanı jılawlawǵa bolmaytuǵının, xalıq hám isbilermenlerdiń salıq mádeniyatın arttırıp, durıs islegenlerdi xoshametlew jolınan barıw kerek ekenligin atap ótti.
Hár bir taraw boyınsha óz aldına qatnas jasap, isbilermenlerge ashıq-aydın hám nızamlı islewdi paydalı etiw wazıypası qoyıldı. Sonnan kelip shıǵıp, salıq hákimshiligin jetilistiriw hám sanlastırıw, bizneske qosımsha jeńillikler beriw, miynet qatnasıqların jaqsılaw boyınsha tapsırmalar berildi.
Óz gezeginde, salıq mádeniyatı pútkil jámiyettiń jumısına aylanıwı zárúr. Xalqımız hámiyshe qádirlegen hadallıq pazıyleti sońǵı nátiyjede barlıq tarawlarda qut-bereket hám abadanlıq alıp keledi. Bul ideyalardı xalıq arasında úgit-násiyatlap, keńnen engiziw áhmiyetli ekenligi atap ótildi.

ÓzA