Mámleketimiz basshısına Tashkent qalasında energetika sistemasınıń turaqlılıǵın támiyinlew ilajları boyınsha málimleme berildi.

Paytaxtımızda xalıqtıń sanı da, qurılıs kólemi de artıp barmaqta. Bir jıl ishinde 12 mıń jańa quwatlılıq, sawda hám servis kompleksleri iske qosıldı. Adamlardıń turmıs tárizi jaqsılanıp, turmıslıq texnikalardan paydalanıw kóbeymekte.
Bulardıń barlıǵı energiyaǵa talaptı arttıradı. Sonı esapqa alıp, sońǵı eki jılda Tashkentte elektr támiynatın jaqsılaw ushın 2 trillion 800 milliard sum qaratılǵan. 36 podstanciya, 665 transformator, 2 mıń kilometrden aslam tarmaq jańalanǵan.
Biraq ele islenetuǵın jumıslar kóp. 46 podstanciya hám 207 transformator artıqsha júkleme menen islemekte. Jıl basınan berli paytaxtımızda elektrden paydalanıwshılar jáne 40 mıńǵa kóbeygen, talap 6 procentke ósken.
Sonıń menen birge, aldın jazǵı ıssı kúnlerdiń dawamlılıǵı bir hápteden aspaǵan bolsa, bıyıl 20 kúnge shekem sozıldı. Aqıbetinde iyul ayında Tashkent qalasında tutınıw muǵdarı 900 million kilovatt-saattan artqan.
Bul faktorlar modernizaciya processlerin izbe-iz dawam ettiriwdi talap etedi. Prezentaciyada energetika ministri paytaxtımızdaǵı hár bir rayon hám máhálleler kesiminde rejelerdi bildirdi.
Oǵan bola, usı jılı birinshi basqıshta 374 kilometr tarmaq, 11 podstanciya, 62 transformatordı jańalaw názerde tutılǵan. Kelesi jılı jáne 788 kilometr tarmaq, 35 podstanciya hám 145 transformator modernizaciyalanadı. Sonıń ishinde, máhállelerdegi transformator hám tarmaqlar ońlanıp, jańaları ornatıladı.
Prezidentimiz gúzgi-qısqı máwsimge az waqıt qalǵanına itibar qaratıp, bıyılǵı rejeni 1-noyabrge shekem juwmaqlaw zárúrligin atap ótti.
Sońǵı jılları barlıq aymaqlarda generaciya kóbeytilip barılmaqta. Sonıń menen birge, sanaat kárxanaların alternativ energiya sistemasına ótkeriw ilajları kórilmekte. Atap aytqanda, 2027-jılǵa shekem iri kárxanalar hám turizm orınlarında 752 megavattlı quyash stanciyası jáne 812 megavattlı saqlaw quwatlıqların shólkemlestiriw rejelestirilgen.
Juwapkerler atom energetikası baǵdarındaǵı jumıslar haqqında da málimleme berdi.
Bizge belgili, elimizde kishi quwatlılıqtaǵı atom elektr stanciyasın qurıw boyınsha jumıs alıp barılmaqta. Bolajaq stanciyanıń hár bir basqıshı – joybarlastırıwdan baslap juwmaqlanǵanına shekem Xalıqaralıq atom energiyası agentliginiń qatań qadaǵalawı astında boladı, eń aldınǵı qáwipsizlik talapları engiziledi.
Prezidentimiz rejelestirilgen obektlerdi sapa hám múddetke ámel etken halda iske qosıp, turaqlı energiya quwatlıqların jaratıw boyınsha kórsetpeler berdi. Ministrler Kabinetine energiya nátiyjeliligin arttırıw máselesin hár háptede dodalap barıw tapsırıldı.

ÓzA