Ózbekstan Respublikası Prezidenti Shavkat Mirziyoev 9-avgust kúni Ázerbayjan Respublikası Prezidenti Ilham Aliev penen telefon arqalı sóylesti.

Mámleketimiz basshısı tuwısqan Ázerbayjan jetekshisi hám xalqın tariyxıy waqıya – kúni keshe Vashington qalasında Ázerbayjan hám Armeniya arasında tınıshlıq deklaraciyasına qol qoyılǵanı menen qızǵın qutlıqladı.
Tez arada tınıshlıq kelisimine rásmiy qol qoyılıwı Qubla Kavkazda tınıshlıq, turaqlılıq hám rawajlanıwdı támiyinlewde úlken áhmiyetke iye bolatuǵınına isenim bildirildi.
Sonday-aq, Ózbekstan Prezidentiniń bıyıl iyul ayında Ázerbayjanǵa mámleketlik saparı dawamında erisilgen kelisimlerdi ámelge asırıw sheńberinde eki tárepleme strategiyalıq sheriklik hám awqamlaslıq qatnasıqların bunnan bılay da rawajlandırıw hám bekkemlewdiń áhmiyetli máseleleri dodalandı.
Barlıq dárejelerde nátiyjeli sóylesiw hám almasıwlar dawam etpekte. Usı jıldıń basınan tovar almasıw 30 procentke arttı. “Jol kartası” tiykarında ekonomikanıń hár qıylı tarmaqlarında perspektivalı kooperaciyalıq joybarlar qáliplestirilmekte. Neft-gaz tarawındaǵı strategiyalıq joybar boyınsha qol qoyılǵan Ónimdi bólistiriwge baylanıslı kelisim sheńberinde ámeliy jumıslar alıp barılmaqta.
Jetekshiler bolajaq joqarı dárejedegi ushırasıw hám ilajlardıń rejesin de kórip shıqtı.

ÓzA