Oliy Majlis Senatınıń Baslıǵı Tanzila Norboeva basshılıǵındaǵı parlament delegaciyası Túrkmenstannıń Avaza qalasında dawam etip atırǵan BMShtıń teńizge shıǵıw jolına iye bolmaǵan rawajlanıp atırǵan mámleketler boyınsha úshinshi konferenciyası sheńberinde Jetekshi hayal-qızlar forumında qatnastı.

Forumda gender teńlikti támiyinlew, hayal-qızlardıń jámiyettegi ornı hám huqıqların keńeytiw máseleleri dodalandı.
Onda Ózbekstanda gender teńlikti támiyinlew baǵdarında alıp barılıp atırǵan sistemalı reformalar ayrıqsha atap ótildi. Konferenciya qatnasıwshıları tárepinen Ózbekstan tájiriybesi basqa mámleketlerdiń parlamentleri ushın aldınǵı model sıpatında atap ótildi.
Atap ótilgenindey, mámleketimizde gender teńligin támiyinlew baǵdarındaǵı háreketler 2030-jılǵa shekem mólsherlengen Milliy strategiya tiykarında alıp barılmaqta hám bul qatnas BMShtıń Turaqlı rawajlanıw maqsetlerine tolıq sáykes keledi.
Ilaj dawamında shańaraqlıq zorlıqqa shek qoyıw, sociallıq qorǵawǵa mútáj hayal-qızlardı qollap-quwatlaw boyınsha qabıl etilgen nızamshılıq hújjetleri hám alǵa qoyılǵan baslamalar da atap ótildi.
Senat Baslıǵı forumdaǵı shıǵıp sóylegen sózinde Oraylıq Aziya mámleketleri jetekshi hayal-qızları arasındaǵı sóylesiwdi kúsheytiw, ámeliy birge islesiwdi jáne de nátiyjeli alıp barıw boyınsha bir qatar usınıslardı alǵa qoydı.
Atap aytqanda, hayal-qızlardıń sociallıq, ekonomikalıq hám siyasiy turmıstaǵı belsendiligin arttırıw, aldıńǵı tájiriybe almasıwdı jolǵa qoyıw, qararlar qabıl etiw procesinde olardıń qatnasın keńeytiw hám isbilermen hayal-qızlar arasındaǵı birge islesiwdi bekkemlew áhmiyetli ekenligi atap ótildi. Sonıń menen birge, Avaza háreketler baǵdarlamasın regionallıq dárejede ámelge asırıw boyınsha anıq usınıslar alǵa qoyıldı.

ÓzA