Házirgi kúnlerde “Ózeltexsanaat” associaciyasınıń baslıǵı Mirziyod Yunusov basshılıǵındaǵı jumısshı topar xızmet saparı menen Qıtay Xalıq Respublikasında bolıp tur.

Sapar sheńberinde jumısshı topar Qıtaydıń jetekshi elektronika kompaniyalarınan biri bolǵan “China Electronics Corporation” (CEC) vice-prezidenti Yan Liming penen ushırasıw ótkerdi.
Sóylesiwlerde zamanagóy elektronika ónimlerin islep shıǵarıw, aldıńǵı texnologiyalardı transferlew, birgeliktegi joybarlardı ámelge asırıw hám Ózbekstanda CEC penen birgelikte óndiris quwatlıqların shólkemlestiriw máseleleri dodalandı.
Birlespeniń málimleme xızmetiniń málim etiwinshe, “China Electronics Corporation” (CEC) – Qıtaydıń elektronika hám málimleme texnologiyaları tarawındaǵı eń iri konglomeratlarınan biri bolıp esaplanadı. Kompaniya quramında 660 tan aslam birgeliktegi kárxana jumıs alıp baradı. Olardıń qatarına (CEC) “Panda”, “Great Wall Technology”, “China Software & Service Co.” sıyaqlı iri strukturalar kiredi. Ulıwma xızmetkerlerdiń sanı 130 mıńnan asadı.
(CEC) kompaniyası 14 jıldan berli “Fortune Global 500” diziminde atap kórsetilmekte. 2024-jılı ol dúnyadaǵı eń iri kompaniyalar arasında 435-orındı iyeledi. Sonday-aq, kompaniya “Sanlı Qıtay” hám “Qıtayda islep shıǵarılǵan-2025” sıyaqlı milliy strategiyalardı ámelge asırıwda jetekshi rol atqaradı. Onıń ónimleri hám sheshimleri dúnyanıń 60 tan aslam mámleketine eksport etilmekte.
Ózbekstan hám Qıtay arasındaǵı sanaat kooperaciyasın bekkemlew, atap aytqanda, elektrotexnika tarawında uzaq múddetli strategiyalıq sheriklikti rawajlandırıwdan eki tárep te mápdar ekenin atap ótti.
Ushırasıw juwmaǵında óz-ara birge islesiwdiń perspektivalı baǵdarların úyreniw hám ámeliy ilajlardı belgilew boyınsha kelisimge erisildi.

N.Ziyodullaeva, ÓzA