Prezidentimiz Shavkat Mirziyoevtiń BMShtıń Teńizge shıǵıw imkaniyatı joq rawajlanıp atırǵan mámleketler boyınsha úshinshi konferenciyasına qatnasıw ushın Kaspiy boyındaǵı Avazaǵa ámeliy saparı Ózbekstan-Túrkmenstan qatnasıqlarınıń ózine tánligin jáne bir márte tastıyıqladı.

2017-jıl mart ayında Prezident Shavkat Mirziyoev dáslepki mámleketlik saparın Túrkmenstanǵa ámelge asırǵanı biykarǵa emes. Ótken jıllar dawamında mámleketimiz basshısı, Túrkmen xalqınıń milliy jetekshisi Gurbanguli Berdimuhamedov hám Túrkmenstan Prezidenti Serdar Berdimuhamedovtıń háreketleri sebepli eki mámleket arasındaǵı baylanıslar pútkilley jańa dárejege kóterildi. Búgin Ózbekstan hám Túrkmenstan Oraylıq Aziyada haqıyqıy jaqsı qońsıshılıq hám óz-ara isenimge tiykarlanǵan birge islesiwdiń ayqın úlgisi bolıp esaplanadı.
BMSh konferenciyası sheńberinde Prezident Shavkat Mirziyoev Túrkmenstannıń “Birge islesiwdi rawajlandırıwǵa qosqan úlesi ushın” ordeni menen sıylıqlandı. Usı jılı Gurbanguli Berdimuhamedovqa Ózbekstannıń joqarı sıylıǵı – “Oliy darajali Dwstlik” ordeni tapsırılǵan edi. Bul da eki mámleket arasındaǵı húrmettiń joqarı dárejesin ańlatadı.
Atap aytqanda, sońǵı jılları Prezidentimiz qońsı hám dúnyadaǵı jetekshi mámleketlerdiń bir qatar abıraylı sıylıqlarına iye boldı. Qazaqstannıń “Altın qıran” hám “Dostıq,” Qırǵızstannıń “Danaker,” Tájikstannıń “Zarrintoj,” Rossiyanıń Aleksandr Nevskiy, Franciya Húrmetli legionı, Túrkiyanıń “Respublika” ordenleri, Túrkiy dúnyanıń joqarı ordeni, ǴMDA húrmetli belgisi, Oraylıq Aziya mámleketleri basshılarınıń húrmetli belgisi hám basqalar usılardıń qatarına kiredi.
Álbette, bul sıylıqlardıń hár biri tek ǵana Prezident Shavkat Mirziyoevtiń jumısına berilgen baha emes. Olardıń artında mámleketimiz basshısınıń kásiplesleri, birge islesiwshi mámleketler jetekshileri menen birgeliktegi nátiyjeli miyneti turadı. Mine, usınday awızbirshilik sebepli Oraylıq Aziya búgin báseki emes, al birge islesiw mákanına aylanıp baratırǵanında olardıń da xızmetleri sheksiz.
Ulıwma alǵanda, bul sıylıqlar Ózbekstannıń xalıqaralıq jámiyetshilikte isenimli, juwapkershilikli hám intaker birge islesiwshi sıpatındaǵı abırayı bekkemlenip atırǵanınan dárek beredi. Sonıń menen birge, Prezident Shavkat Mirziyoevtiń sırtqı siyasat strategiyası bálentpárwaz bildiriwlerge emes, al anıq ámeliy háreketlerge: óz-ara kelisimler, birgeliktegi joybarlar, ashıq shegaralar, jańa transport koridorları hám sóylesiw maydanlarına súyenedi. Bulardıń barlıǵı – xalqımızdıń turmısın jaqsılaw hám abadanlıǵın arttırıw ushın.
Usı kózqarastan, Túrkmenstan ordeniniń beriliwin rásmiatshılıq emes, al Ózbekstannıń regionda turaqlılıq hám birge islesiwdi támiyinlewdegi belsene hám konstruktivlik poziciyasınıń tán alınıwı bolıp esaplanadı. Bul tek ǵana sıylıq emes, al global turaqsızlıq, isenim jetispewshiligi hám qáwip-qáterler fonında Ózbekstan hám onıń sherikleri regionda jaratıp atırǵan turaqlı ortalıq úlken qádiriyatqa aylanıp atırǵanın kórsetedi. Mine, usı turaqlılıqtı támiyinlep atırǵan kim bolsa, onıń miyneti múnásip húrmetke ılayıq.
Sapar etiwdiń jáne bir tásirli tárepi Arqadaǵ Túrkmenstanda qáliplesken protokol tártip-qaǵıydalarınan shetke shıǵıp, Prezidentimizdi aeroportta jeke ózi shıǵarıp salǵanı boldı. Bul óz-ara húrmetke tiykarlanǵan qızǵın hám doslıq qatnasıqlardıń, xalıqlarımız arasındaǵı haqıyqıy tuwısqanlıq baylanıslarınıń biybaha úlgisi bolıp esaplanadı.

ÓzA