Bizge belgili, usı jıldıń 4-5-avgust kúnleri Ózbekstan Respublikası Prezidenti Shavkat Mirziyoev Túrkmenstanǵa ámeliy sapar menen bardı. Bul sapar etiw hám onıń sheńberindegi áhmiyetli ushırasıw hám kelisimlerdiń áhmiyeti boyınsha Oliy Majlis Nızamshılıq palatasınıń deputatı Gulchehra Tojiboeva óz múnásibetin bildirdi:

– Ózbekstan hám Túrkmenstan arasındaǵı qatnasıqlar barǵan sayın joqarı basqıshqa kóterilip barmaqta. Bul baylanıslar óz-ara isenim, jaqsı qońsıshılıq hám bekkem doslıqqa tiykarlanǵanı itibarǵa ılayıq. Ásirese, sońǵı jılları eki mámleket arasındaǵı sawda aylanısı izbe-iz ósip barmaqta. Usı jıldıń basınan berli bul kórsetkish 600 million dollarǵa shamalastı. Bul bolsa óz-ara paydalı ekonomikalıq baylanıslar izbe-iz hám ámeliy rawajlanıp atırǵanınan dárek beredi. Ásirese, energetika, sanaat, awıl hám suw xojalıǵı, transport sıyaqlı strategiyalıq tarmaqlardaǵı birge islesiw jáne de tereńlesip atır.
Sonday-aq, “Shavat-Tashawız” shegaraaldı sawda zonasın shólkemlestiriw baǵdarındaǵı kelisimler eki mámleket isbilermenleri arasındaǵı baylanıslardı jańa basqıshqa alıp shıǵıwı, shegaraaldı aymaqlardıń rawajlanıwına kúshli túrtki beriwi kútilmekte.
Mámleketimiz basshısı sapar sheńberinde bir qatar áhmiyetli xalıqaralıq ánjumanlar hám eki tárepleme ushırasıwlarda qatnasıp, mámleketimizdiń regionallıq hám global birge islesiwdegi ornın bunnan bılay da bekkemlewge qaratılǵan bir qatar baslamalardı alǵa qoydı.
5-avgust kúni Prezidentimiz BMShtıń teńizge shıǵıw imkaniyatı bolmaǵan rawajlanıp atırǵan mámleketler boyınsha úshinshi konferenciyasına qatnastı. Túrkmenstannıń Avaza qalasında ótken bul ánjuman usı kategoriyadaǵı 30 dan aslam mámleketler ushın áhmiyetli mashqalalardı dodalaw hám xalıqaralıq sheshimlerdi islep shıǵıwǵa qaratılǵan áhmiyetli platformaǵa aylandı.
Ánjumanda transport hám logistika sistemasın rawajlandırıw, sawda processlerin ápiwayılastırıw, klimat ózgeriwi hám onıń aqıbetlerine beyimlesiw, ekonomikalıq turaqlılıq hám sanlı transformaciya, Turaqlı rawajlanıw maqsetlerine erisiw sıyaqlı máseleler hár tárepleme dodalandı.
Prezidentimiz bul ánjumandaǵı shıǵıp sóylegen sózinde Ózbekstannıń regionallıq birge islesiw, qorshaǵan ortalıqtı qorǵaw hám inklyuziv rawajlanıwǵa baylanıslı kózqarasın anıq bildirdi.
Sapar etiw sheńberinde Prezident Shavkat Mirziyoev Oraylıq Aziya mámleketleri basshılarınıń jetinshi Másláhát ushırasıwına tayarlıq máselelerine baǵıshlanǵan ilajda da qatnastı. Bunday ushırasıwlar region mámleketleri arasındaǵı siyasiy sóylesiwdi tereńlestiriw, aymaqlıq qáwipsizlikti támiyinlew, shegaralararalıq baylanıslar, suw-energetika resursları hám transport-kommunikaciya tarawındaǵı mashqalalardı kelisilgen halda sheshiwde áhmiyetli platforma wazıypasın atqarmaqta.
Ásirese, Tashkentte bolıp ótiwi rejelestirilip atırǵan gezektegi Másláhát ushırasıwı sheńberinde qabıl etiliwi kútilip atırǵan kelisimler regionda siyasiy turaqlılıqtı támiyinlew, ekonomikalıq birge islesiwdi kúsheytiw hám ulıwma strategiyalıq maqsetlerdi muwapıqlastırıwdı jáne de nátiyjeli ámelge asırıwǵa tiykar jaratadı.
Prezident Shavkat Mirziyoevtiń Túrkmenstanǵa ámeliy saparı tek ǵana eki tárepleme qatnasıqlar emes, al keń regionallıq hám xalıqaralıq dárejedegi birge islesiw perspektivaların belgilep beretuǵın áhmiyetli diplomatiyalıq qádem bolıp esaplanadı. Ózbekstan búgin xalıqaralıq maydanda jedel, ashıq hám pragmatikalıq siyasat júrgizip atırǵan eken, onıń baslamaları tek ǵana milliy máplerge emes, al regionallıq hám dúnya kólemindegi turaqlı rawajlanıw maqsetlerine de xızmet etip atırǵanın jáne bir márte tastıyıqladı.

ÓzA