Oliy Majlis Senatı Baslıǵı Tanzila Norboeva Avaza qalasında Xalıqaralıq migraciya shólkeminiń BMShtaǵı missiyası basshısı Per Lilert penen ushırasıw ótkerdi.

Ushırasıwda P.Lilert Ózbekstannıń global, qáwipsiz, tártipli hám turaqlı migraciya haqqındaǵı xalıqaralıq kelisimlerdi birinshilerden bolıp qollap-quwatlanǵan mámleketlerden biri ekenin atap ótti. Sonday-aq, 30-iyul – Pútkil Jer júzilik adam sawdasına qarsı gúresiw kúni múnásibeti menen Adam sawdasına qarsı gúresiw hám múnásip miynet máseleleri boyınsha milliy komissiya tárepinen shólkemlestirilgen «Adam sawdasına qarsı gúresiwde global tallawlar: jámiyettiń roli hám xalıqaralıq birge islesiw» temasındaǵı xalıqaralıq konferenciya joqarı bahalandı.
Sóylesiw waqtında sırt elde waqtınshalıq miynet etip atırǵan watanlaslarımız hám olardıń shańaraqların qollap-quwatlaw, adam sawdasına qarsı gúresiwde birge islesiwdi kúsheytiw máseleleri dodalandı.
Sonday-aq, Ózbekstan puqaraların jumıs penen támiyinlew hám global migraciya processleri sheńberinde puqaralardıń máplerin qorǵawǵa qaratılǵan nızamshılıqtı jetilistiriw hám zárúr ilajlar kóriw boyınsha pikir alısıldı.

Qaraqalpaqstan xabar agentligi