Mámleketimizde awıllıq jerlerdi hár tárepleme rawajlandırıwǵa qaratılǵan jumıslar izbe-iz dawam ettirilmekte. Bul baǵdarda alıp barılıp atırǵan keń kólemli reformalar orınlarda zamanagóy infrastrukturalardı jaratıwǵa, tálim-tárbiya sistemasın bunnan bılay da jetilistiriwge xızmet etpekte. Prezidentimizdiń “Islam rawajlanıw banki hám OPEK xalıqaralıq rawajlanıw fondınıń qatnasıwında awıllıq jerlerdi turaqlı rawajlandırıw” joybarı tiykarında bir qatar jumıslar ámelge asırılmaqta.

Sonıń ishinde, Ellikqala rayonında gezektegi áhmiyetli qádem qoyıldı. “Barhayot” mákan puqaralar jıyını aymaǵında ulıwma bahası 5 milliard 755 million sum bolǵan jańa mámleketlik mektepke shekemgi bilimlendiriw mákemesi paydalanıwǵa tapsırıldı. Jańa baqsha zamanagóy talaplarǵa tolıq juwap beretuǵın, balalar ushın qáwipsiz hám qolaylı ortalıqta jumıs alıp baradı, – dep maǵlıwmat beredi rayon hákimligi Málimleme xızmeti bólimi.
Shólkemniń ashılıw máresiminde rayon hákimi V.Niyazimbetov, tarawdıń tiyisli qánigeleri hám keń jámiyetshilik wákilleri qatnastı.
Bul baqsha tek ǵana tárbiya procesin jáne de nátiyjeli shólkemlestiriwge emes, al keleshek áwladtıń salamat hám bárkamal bolıp ósiwine xızmet etetuǵını sózsiz. Búgingi kúnde bunday rawajlanıw jumısları arqalı elimizdegi awıllar barǵan sayın abat bolıp, bilimlendiriw mákemeleri jańalanbaqta. Nátiyjede balalarımız múnásip bilim alıw hám abadan turmıs keshiriw imkaniyatına iye bolmaqta.

Qaraqalpaqstan xabar agentligi