Birlesken Milletler Shólkeminiń Teńizge shıǵıw imkaniyatı joq rawajlanıp atırǵan mámleketler boyınsha úshinshi konferenciyası sheńberinde Ózbekstan Respublikası Prezidenti Shavkat Mirziyoevqa Túrkmenstannıń “Birge islesiwdi rawajlandırıwǵa qosqan úlesi ushın” ordenin saltanatlı tapsırıw máresimi bolıp ótti.

Mámleketimiz basshısı Túrkmen xalqınıń milliy jetekshisi, Xalıq Másláháti Baslıǵı Gurbanguli Berdimuhamedovqa, Túrkmenstan Prezidenti Serdar Berdimuhamedovqa hám tuwısqan túrkmen xalqına joqarı mámleketlik sıylıq ushın tereń minnetdarshılıq bildirdi.
– Bul sıylıqtı Ózbekstan hám onıń kóp milletli xalqına ayrıqsha itibar hám húrmet, Oraylıq Aziya regionında doslıq, jaqsı qońsıshılıq, óz-ara isenim hám sheriklik qatnasıqların bekkemlew baǵdarındaǵı ulıwma háreketlerimizdiń tán alınıwı sıpatında qabıl etemen,-dedi mámleketimiz basshısı.
Bay tariyxıy tájiriybe, tuwısqanlıq hám óz-ara húrmet dástúrlerine tiykarlanǵan Ózbekstan-Túrkmenstan strategiyalıq sheriklik qatnasıqlarında joqarı dárejege erisilgeni qanaatlanıwshılıq penen atap ótildi.
Keyingi jıllarda áhmiyetli ekonomikalıq hám gumanitarlıq joybarlar ámelge asırıldı, óz-ara sawda hám kooperaciya kólemi keskin arttı.
Ózbekstan jetekshisi Arqadaǵ hám regionnıń barlıq mámleketleri basshıları Oraylıq Aziyada birge islesiwdi alǵa qoyıwǵa úlken úles qosıp atırǵanın ayrıqsha atap ótti. Búgin pútkil xalıqaralıq jámiyetshilik regionallıq sheriklik hám ózliktiń jańa modelin qurıwdaǵı ulıwma jetiskenliklerimizdi tán alıp atırǵanı atap ótildi.
Sóziniń juwmaǵında mámleketimiz basshısı joqarı sıylıq ushın jáne bir márte minnetdarshılıq bildirip, tuwısqan túrkmen xalqın usı kúnlerde ótip atırǵan BMSh konferenciyası menen qutlıqladı hám usı jıldıń dekabr ayında Ashxabad qalasında Xalıqaralıq tınıshlıq hám isenim jılı sheńberindegi global sammit tabıslı ótiwin tiledi.

ÓzA