Oliy Majlis Nızamshılıq palatasındaǵı “Milliy tiklanish” demokratiyalıq partiyası frakciyasınıń májilisinde “Balalardı sociallıq qorǵaw sistemasınıń jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam joybarı dodalandı.

Bul joybar menen 20 nızam hújjetine tiyisli ózgerisler kirgizilmekte. Jas óspirimlerge ǵamxorlıq hám qáwenderlik uyımı etip “Insan” sociallıq xızmetler orayları belgilenbekte. Sonday-aq, qáwenderlik hám qayırqomlıq boyınsha “Insan” sociallıq xızmetler orayları jáne Sociallıq qorǵaw milliy agentliginiń wazıypaları hám wákillikleri belgilenbekte.
Bunnan tısqarı, sırt elde jetim yamasa ata-ana qaramaǵınan ayırılǵan Ózbekstan Respublikasınıń puqarası bolǵan jas óspirim balalardı watanǵa qaytarıwda konsullıq mákemeleriniń rolin arttırıw boyınsha ózgerisler kirgizilmekte.
Sonday-aq, Ózbekstan Respublikasınıń Jınayat-processuallıq kodeksine jas óspirimlerdiń jınayatları haqqındaǵı is jabıq sud májilisinde kóriliwin názerde tutatuǵın ózgerisler hám qosımshalar kirgizilmekte.
Bul nızam joybarınıń qabıl etiliwi menen Sociallıq qorǵaw milliy agentligi, atap aytqanda, “Insan” sociallıq xızmetler oraylarınıń jetim balalar hám ata-ana qaramaǵınan ayırılǵan balalardıń huqıqları menen nızamlı máplerin qorǵaw ushın huqıqıy tiykarlar jaratıladı. Jas óspirim balalardıń ata-anaları, tálim-tárbiya hám medicina mákemeleriniń xızmetkerleri tárepinen olarǵa ǵamxorlıq kórsetpewden yamasa zorlıqtan qorǵaw támiyinlenedi.

Muhtarama Komilova, ÓzA