Ózbekstan Respublikası Prezidenti Shavkat Mirziyoev Túrkmenstan Prezidenti Serdar Berdimuhamedovtıń mirát etiwine bola 4-avgust kúni ámeliy sapar menen usı mámleketke keldi.

Túrkmenbashı qalası aeroportında mámleketimiz basshısın Túrkmen xalqınıń milliy jetekshisi, Xalıq Másláháti Baslıǵı Gurbanguli Berdimuhamedov kútip aldı.
Prezident Shavkat Mirziyoev Túrkmenbashı qalasına kelgennen soń, Gurbanguli Berdimuhamedov penen ushırasıw ótkerdi.
Sóylesiw aldınan mámleketimiz basshısı Gurbanguli Berdimuhamedovtı BMShtıń Teńizge shıǵıw imkaniyatı joq rawajlanıp atırǵan mámleketler boyınsha úshinshi konferenciyası joqarı dárejede ótkerilip atırǵanı menen qızǵın qutlıqlap, onıń kún tártibine kirgizilgen máseleler regionımızdıń turaqlı rawajlanıwı ushın oǵada úlken áhmiyetke iye ekenin ayrıqsha atap ótti.
Usı jıldıń aprel ayında Samarqand qalasında bolıp ótken ushırasıwda erisilgen kelisimlerdi ámelge asırıw sheńberinde Ózbekstan – Túrkmenstan jaqsı qońsıshılıq hám strategiyalıq sheriklik qatnasıqların jáne de bekkemlewdiń áhmiyetli máseleleri kórip shıǵıldı.
Doslıq, óz-ara isenim hám ulıwma máplerdi esapqa alıw principlerine tiykarlanǵan kóp táreplemeli birge islesiwdiń páti artıp baratırǵanı úlken qanaatlanıwshılıq penen atap ótildi.
Barlıq dárejelerde nátiyjeli hám jedel sóylesiwler dawam etpekte. Jıl basınan berli tovar almasıw 600 million dollardı quradı. Sanaat, energetika, transport, awıl hám suw xojalıǵı, ekonomikanıń basqa da tarmaqlarında kooperaciya tereńlesip barmaqta.
Birgelikte “Shavat – Tashawız” shegaraaldı sawda zonası shólkemlestirilmekte, jedel aymaqlararalıq baylanıslar hám gumanitarlıq almasıwlar dawam ettirilmekte.
Bolajaq joqarı dárejedegi ushırasıwlarǵa tayarlıq sheńberinde húkimetleraralıq komissiyalardıń májilisleri, Isbilermenler keńesi, Aymaqlar forumı, bir qatar mádeniy ilajlar ótkeriliwi názerde tutılǵan.
Sonday-aq, BMSh konferenciyasınıń kún tártibi hám usı jılı gúzde Tashkent qalasında ótkeriliwi rejelestirilgen Oraylıq Aziya mámleketleri basshılarınıń jetinshi Másláhát ushırasıwı boyınsha hár tárepleme pikir alısıldı.
Ózbekstan jetekshisi 5-avgust kúni BMShtıń Teńizge shıǵıw imkaniyatı joq rawajlanıp atırǵan mámleketler boyınsha úshinshi konferenciyasında, Oraylıq Aziya mámleketleri basshılarınıń jetinshi Másláhát ushırasıwına tayarlıq kóriw máselelerine baǵıshlanǵan arnawlı ilajda qatnasadı jáne bir qatar eki tárepleme sóylesiwler ótkeredi.

ÓzA