Ózbekstan elshisi Baxtiyor Ibragimov Qazaqstan Qarjı ministrligi janındaǵı Mámleketlik dáramatlar komitetiniń baslıǵı Jandos Duysembiev penen ushırastı, dep xabar bermekte “Dunyo” MA.

Sóylesiw aldınan Jandos Duysembiev Ózbekstan hám Qazaqstan arasındaǵı izbe-iz pátlerde rawajlanıp atırǵan sawda-ekonomikalıq qatnasıqlardıń unamlı dinamikasın atap ótti.
Sóylesiwler dawamında bajıxana tártip-qaǵıydaların ápiwayılastırıw, bajıxana málimleme sistemaların úylestiriw, zamanagóy logistika orayların qurıw, sonday-aq, júkti tasıw hám jetkerip beriwde waqıt hám materiallıq qárejetlerdi azaytıw ushın shegara ótiw punktlerin modernizaciyalaw máseleleri kórip shıǵıldı.

Gishtkwprik (Ózbekstan) – Jibek Joli (Qazaqstan) hám Dawıt-ata (Ózbekstan) – Tajen (Qazaqstan) tiykarǵı shegara ótkeriw punktlerinde ońlaw jumısların jedellestiriw arqalı sawda kólemin hám turizm kórsetkishlerin arttırıwda ámelge asırılatuǵın ilajlar boyınsha pikir alısıldı.
Sırdárya wálayatı aymaǵında shólkemlestirilip atırǵan Xalıqaralıq sanaat kooperaciyası orayı janında jaylasqan Sırdárya-Atameken shegara ótkeriw punkti infrastrukturasın zamanagóy talaplar tiykarında modernizaciyalaw máselesine ayrıqsha itibar qaratıldı.
Tárepler miywe-ovoщ hám basqa da tez buzılatuǵın júklerdi tasıwda qolaylıqlar jaratıw, olardıń operativ háreketleniwin támiyinlew maqsetinde “jasıl koridor” sistemasın engiziw perspektivaların dodaladı.
Ótkerilgen ushırasıw Ózbekstan hám Qazaqstan arasındaǵı sawda-ekonomikalıq, logistika hám transshegaralıq birge islesiwdi keńeytiw, eki mámleket arasındaǵı tovar aylanısı hám transport-tranzit potencialın arttırıwǵa qaratılǵan ámeliy ilajlardı belgilep alıwda úlken áhmiyetke iye boldı.

Qaraqalpaqstan xabar agentligi