Mámleketimiz basshısına Samarqand wálayatındaǵı reformalardıń nátiyjeliligi hám jańa rejeler boyınsha málimleme berildi.

Samarqand – xalqı sanı hám ósiwi boyınsha respublikamızdaǵı eń iri aymaq bolıp esaplanadı. Bul jańa turaq jaylar, infrastruktura, jumıs ornı, bilimlendiriw hám medicinaǵa talap artadı, degeni. Keyingi segiz jılda wálayatta 1 mıń 132 kóp qabatlı turaq jay qurılıp, 56 mıń shańaraqtıń turmıs sharayatı jaqsılanǵan. Mektepke shekemgi bilimlendiriwge qamtıp alıw 21 procentten 73 procentke, joqarı bilimlendiriwde 10 procentten 45 procentke jetken.

Ekonomikada toqımashılıq, metallurgiya, elektr texnikası, qurılıs materialları, turizm jedel rawajlanbaqta. Dóretiwshilik, iri joybarlar hám joqarı dáramatlı jumıs orınları xalıqtıń erteńgi kúnge isenimin arttırmaqta.

Wálayatta kámbaǵallıq dárejesi jıl basınan berli 7,5 procentten 6,4 procentke azayǵan. Jıldıń aqırına shekem 150 mıń adamdı jumısqa jaylastırıp, 90 mıń xalıqtı kámbaǵallıqtan shıǵarıw maqset etilgen.

Ótken segiz jılda aymaqta sanaat ónimleri 1,7 esege ósip, házirgi waqıtta 45 trillion sumnan artqan. Biraq bul nátiyjelerdiń 37 procenti Samarqand qalasına, 23 procenti Jambay, Samarqand hám Urgut rayonlarına tuwra keledi. Qwshrabat, Payariq hám Nurabadta sanaat salıstırmalı rawajlanbaǵan.

Mámleketimiz basshısınıń baslamasına muwapıq, Samarqand wálayatında da “Reformalar shtabı” dúzildi. Prezentaciyada isbilermenlerdiń usınısları tiykarında islep shıǵılǵan jańa joybarlar haqqında málimleme berildi.

Mısalı, Nurabad rayonında 115 gektar maydanda arnawlı sanaat zonasın shólkemlestiriw usınıs etilmekte. Ol jerde 472 million dollarlıq investiciyalıq joybarlar ámelge asırılıp, 1 mıń 200 jumıs ornı jaratıladı. Qwshrabat rayonında qıtaylı investordıń 40 million dollar tikkeley investiciyası esabınan granit tasın qazıp alıw hám qayta islew mólsherlengen.

Bulunǵurlı isbilermen “in vitro” laboratoriyasın shólkemlestirip, kartoshka tuqımı boyınsha brend jaratıwǵa kirisken. Rayonda 100 million dollarlıq biofarmacevtika kárxanasın iske qosıw da rejelestirilgen.

Ulıwma, wálayatta 1 milliard 200 million dollarlıq 14 jańa joybar qáliplestirilgen. Olardıń nátiyjesinde 12 mıń jumıs ornı, 82 million dollarlıq eksport imkaniyatınıń ashılıwı názerde tutılǵan.

Prezidentimiz bul baslamalardı qollap-quwatlap, joybarlardı jedellestiriw boyınsha kórsetpeler berdi. Hár bir rayon hám qalanıń investiciyalıq tartımlılıǵı hám eksport imkaniyatların turaqlı arttırıp barıw zárúrligi atap ótildi.

ÓzA