Prezident Shavkat Mirziyoev 29-iyul kúni turmıslıq korrupciyaǵa qarsı gúresiw hám onıń aldın alıw ilajları boyınsha prezentaciya menen tanıstı.

Bul júdá áhmiyetli, kópshilik xalıqqa tiyisli másele. Sebebi korrupciya jaǵdaylarınıń 75 procenti qala hám rayonlarda turmıslıq formada bolmaqta.

Sonıń ushın 5-mart kúni Korrupciyaǵa qarsı gúresiw milliy keńesiniń májilisinde bul illetke shek qoyıw wazıypası qoyılǵan edi. Usı maqsette, Prezidenttiń 21-apreldegi pármanı menen Bas prokuraturada korrupciya faktorların tallaw bólimi shólkemlestirildi. Aymaqlarǵa turaqlı shıǵıp, bunday faktorlar úyrenip barılmaqta.

Prokuratura sistemasındaǵı Huqıq qorǵaw akademiyası hám ilimiy-izertlew orayında 200 den aslam qánige ilim hám tallaw menen shuǵıllanbaqta. Ulıwma, huqıq qorǵaw uyımlarında 100 mıńnan aslam xızmetker korrupciyanıń aldın alıw boyınsha jumıs alıp barmaqta.

Biraq kóp jaǵdaylarda bul illettiń sebepleri shette qalıp, aqıbeti menen gúresilmekte. Korrupciyaǵa jol qoymaytuǵın preventivlik ilajlar ele jeterli emes. Hár kúni adamlardıń jumısı túsetuǵın hákimlik, kadastr, bank hám salıq uyımlarında byurokratiya, “korrupciyalıq sańlaq” tolıq joq bolǵanı joq.

Prezentaciyada bul baǵdardaǵı qosımsha ilajlar dodalandı.

Elimizde 43 qadaǵalaw uyımı bar. Barlıq ministrliklerde komplaens qadaǵalaw bólimleri shólkemlestirilgen. Bárinen burın, olardıń nátiyjeliligin arttırıw wazıypası qoyıldı. Ministrlikler hám uyımlar janındaǵı inspekciyalardıń bul baǵdardaǵı jumısına da sın kózqarastan múnásibet bildirildi.

Prezidentimiz korrupciyanıń tek azayǵanı emes, qanshalarınıń aldın alınǵanına qarap, mámleketlik uyımlardıń jumısına baha beriw kerek ekenligin atap ótti.

Jer ajıratıw boyınsha ashıq-aydın sistema engizilgen. Biraq, orınlarda bul baǵdarda nızamsız háreketler elege shekem ushırasıp atır. Sol sebepli kadastr, “Ózbekkosmos,” qurılıs hám basqa da tiyisli shólkemlerdiń maǵlıwmatların tallap, bunday jaǵdaylarǵa pútkilley shek qoyıw shárt ekenligi kórsetip ótildi.

Prokuratura sistemasın tolıq sanlastırıw hám barlıq tarawlar ústinen “sanlı qadaǵalaw” ornatıw zárúr ekenligi atap ótildi.

Korrupciyaǵa qarsı gúresiw milliy keńesiniń májilisinde parlamenttiń juwapker komitetlerine máhállege túsip, korrupciyalıq jaǵdaylardıń kelip shıǵıw sebeplerin úyreniw, mámleketlik satıp alıwlarda tikkeley shártnamalardı azaytıw, jaslar arasında korrupciyaǵa mawasasızlıq ortalıǵın qáliplestiriw sıyaqlı áhmiyetli máselelerde usınıslar berildi.

Prezentaciyada oǵan juwapkerler orınlanǵan jumıslar haqqında málimleme berdi.

ÓzA