Prezident Shavkat Mirziyoev 23-iyul kúni Esap palatasınıń jumısı hám orınlaw sistemasın jetilistiriw ilajlarına baylanıslı prezentaciya menen tanıstı.

Ózbekstan Respublikası Prezidentiniń 2024-jıl 10-iyuldegi “Byudjet qarjılarınan paydalanıw ústinen finanslıq qadaǵalawdı kúsheytiw boyınsha qosımsha ilajlar haqqında”ǵı pármanına muwapıq, Esap palatasınıń jumıs usılı ózgerdi, onıń wákillikleri keńeytildi. Eskishe tekseriwlerden waz keshilip, finanslıq, muwapıqlıq, nátiyjelilik hám strategiyalıq audit sisteması engizildi.

Endi bul palata tek ǵana qadaǵalawshı emes, al byudjet tártibin qollap-quwatlawshı birge islesiwshi uyım bolıp esaplanadı. Sol sebepli tiykarǵı itibar finanslıq tártip buzılıwınıń aldın alıw, onıń faktorların tallawǵa qaratılmaqta.

Máselen, usı jıldıń 6 ayında ótkerilgen audit ilajları nátiyjesinde 5 trillion 600 milliard sum nátiyjesiz byudjet qárejetleri qısqartılǵan, byudjetke 5 trillion sum qosımsha túsim túsiw imkaniyatı anıqlanǵan.

Mámleketimizdiń ekonomikası izbe-iz ósip barmaqta. Bul, óz gezeginde, finanslıq qadaǵalaw kólemi hám jumıs kólemin de arttıradı. Bunı qamtıp alıwdıń nátiyjeli jolı – sanlastırıw. Usı maqsette “Rásmiy audit” málimleme sisteması iske qosılǵan. Házirge shekem ol arqalı 4 trillion sumlıq kemshilikler saplastırılǵan.

Prezentaciyada endi sistemaǵa jasalma intellektti engizip, kemshiliklerdi keltirip shıǵarıp atırǵan faktorlardı saplastırıw wazıypası qoyıldı.

Ótken jılı 12 ministrlikte finanslıq qadaǵalaw boyınsha shólkemlestirilgen situaciyalıq oraylardıń kórsetkishleri atap ótilip, bul sistema usı jılı jáne 10 ministrlik hám uyımǵa keńeytiletuǵını belgilendi. Sonıń menen birge, byudjet shólkemlerinde ishki audit hám ishki qadaǵalaw sistemaların jetilistirip, Esap palatası menen málimleme almasıwdı kúsheytiw boyınsha tapsırma berildi.

Prezident pármanına tiykarlanıp, mámleketlik audit xalıqaralıq standartlar dárejesine shıǵarılmaqta. Esap palatasınıń xızmetkerleri bir jıl dawamında xalıqaralıq auditorlar menen birgelikte islep, tájiriybe arttırdı. Nátiyjede sırtqı qarız esabınan bolıp atırǵan joybarlar xalıqaralıq kriteriyalar tiykarında auditten ótkerilmekte. Bunday tártipti joybarlardıń dáslepki basqıshlarınan baslaw áhmiyetli ekenligi kórsetip ótildi.

Bıyıl 16-iyun kúni reformalardıń nátiyjeliligin tallaw boyınsha ótkerilgen videoselektor májilisinde Esap palatasına “Xalıq qadaǵalawı” platformasın barlıq aymaqlarda jolǵa qoyıw tapsırılǵan edi. Prezentaciyada juwapkerler bul baǵdarda baslanǵan jumıslar hám zárúr ilajlar haqqında málimleme berdi.

Bul sistema arqalı qurılıs, infrastruktura, kommunallıq xızmetler, energiya támiynatı, transport, jol, ekologiya sıyaqlı tarawlardaǵı mashqalalar boyınsha xabar beriledi. Olardı sheshiw ushın portalǵa barlıq ministrlik, uyım hám hákimlikler jalǵanadı.

Házirgi kúnde bul baǵdarlamanı jasalma intellekt tiykarında jetilistiriw, vertikal qadaǵalaw sistemasın jolǵa qoyıw, koll-oraylar shólkemlestiriw boyınsha jumıslar alıp barılmaqta.

Mámleketimiz basshısı juwapkerlerge orınlaw tártibin bekkemlew, byudjet qarjılarınan maqsetli paydalanıw hám únemlilikti támiyinlew boyınsha kórsetpeler berdi.

ÓzA