Ózbekstan Respublikası Prezidentiniń qararı

Ózbekstan Respublikası Prezidentiniń usı jıl 24-25-iyun kúnleri Mongoliyaǵa mámleketlik saparı dawamında erisilgen kelisimler sheńberinde awıl xojalıǵı hám azıq-awqat tarawlarında belgilengen wazıypalardıń óz waqtında hám tolıq ámelge asırılıwın támiyinlew maqsetinde qarar etemen:

1. Maqsetler

Ózbekstan hám Mongoliya arasında 2025-2026-jıllarda awıl xojalıǵı hám azıq-awqat tarawlarında ámelge asırılatuǵın ilajlardıń tiykarǵı kórsetkishleri etip tómendegiler belgilensin:

(a) Mongoliyadan Ózbekstanǵa 100 mıń bas qoy-eshkilerdi alıp keliw hám olardı jergilikli sharayatta násilshilik-selekciya jumısları járdeminde kóbeytiw arqalı olardıń sanın 2029-jıldıń aqırına shekem 1 mln basqa jetkeriw;

(b) basqıshpa-basqısh jún hám kashemirdi qayta islew hám tayar ónimler islep shıǵarıwdı jolǵa qoyıw;

(v) miywe-ovoщ hám azıq-awqat ónimleriniń Mongoliyaǵa eksport kólemin hár jılı arttırıp barıp, 10 esege kóbeytiw ilajların kóriw;

(g) Ózbekstan hám Mongoliya arasında awıl xojalıǵı ónimlerin islep shıǵarıw tarawında tájiriybe almasıw hám qánigelerdiń mamanlıǵın arttırıwdı jolǵa qoyıw.

1. Mongoliyadan qoy-eshkilerdi import etiwdi mámleket tárepinen qollap-quwatlaw.
2. 2025-jıl 1-avgusttan 2027-jıl 31-dekabrge shekem Mongoliyadan qoy-eshkilerdi Ózbekstanǵa import etiwde isbilermenlik subektlerine:

(a) hawa transportında tasıw qárejetleriniń 50 procenti Mámleketlik byudjet esabınan kompensaciyalanadı. Onda usı kishi bántte názerde tutılǵan qárejetler ushın talap etiletuǵın qarjılar Mámleketlik byudjet parametrlerinde Awıl xojalıǵı ministrligine sharwashılıq xojalıqları tárepinen sırt mámleketlerden import etilgen násilli qaramal, qoy hám eshki, ana balıq hám shójelerdi satıp alıw qárejetleriniń bir bólegin qaplap beriw ushın ajıratılǵan qarjılar sheńberinde qarjılandırılatuǵını.

(b) qosımsha qun salıǵın tólew múddetin procentler esaplanbastan tólem támiynatısız keshiktirip tólew imkaniyatı beriletuǵını belgilep qoyılsın.

Ekonomika hám qarjı ministrligi basqa da qárejetlerdi qayta kórip shıǵıw esabınan 2027-jıl ushın Mámleketlik byudjet parametrlerinde usı qarardıń 2-bánti “b” kishi bántinde kórsetilgen tólemlerdi qaplap beriw boyınsha qárejetlerdi názerde tutsın.

Oraylıq bank, Ekonomika hám qarjı ministrligi jáne Awıl xojalıǵı ministrliginiń Mongoliyadan qoy-eshkilerdi Ózbekstanǵa import etiwde tómendegi usınıslarına kelisim berilsin:

(a) sharwashılıq baǵdarında tartılǵan xalıqaralıq qarjı institutlarınıń kredit qarjıların isbilermenlik subektlerine jıllıq 10 procent stavkada (sonnan 3 procent bank marjası) 5 jıl múddetke 2 jıllıq jeńilletilgen dáwir menen ajıratıw. Onda kommerciyalıq banklerdiń usı kishi bántte názerde tutılǵan kreditlerdi jeńilletilgen shártlerde ajıratıwǵa baylanıslı qárejetleri Mámleketlik byudjetke tólenetuǵın dividendlerin sáykes túrde azaytıw esabınan qaplanadı;

(b) isbilermenlik subektlerine ajıratılatuǵın kredit qarjıları ushın qamsızlandırıw mexanizminen paydalanǵan halda múlk girew támiynatın 50 procentke shekem etip belgilew.

Veterinariya hám sharwashılıqtı rawajlandırıw komitetine (keyingi orınlarda – Veterinariya komiteti) Qaraqalpaqstan Respublikası Ministrler Keńesi Baslıǵı hám wálayat hákimleriniń kepilligi tiykarında bir ay múddette qaytarıw shárti menen Veterinariya xızmeti hám sharwashılıqtı rawajlandırıw qorınıń qarjıları esabınan isbilermenlik subektlerine Mongoliyadan qoy-eshkilerdi jetkerip beriwde finanslıq járdem kórsetiw huqıqı berilsin.

Mongoliyadan Ózbekstanǵa import etiletuǵın qoy-eshkilerdiń aymaqlar kesimindegi bólistiriliwi 1-qosımshaǵa muwapıq tastıyıqlansın.

7. Buxara, Jizzaq, Namangan, Nawayı, Samarqand, Surxandárya, Qashqadárya hám Tashkent wálayatlarınıń hákimleri bir hápte múddette qoy-eshkilerdi baǵıw ushın azıqlıq jeri, sharwashılıq kompleksi hám qánigesi (veterinar) bar bolǵan isbilermenlerdiń dizimin qáliplestirip, Veterinariya komitetine usınsın;
8. Jaylaw jerlerinen nátiyjeli paydalanıwdı shólkemlestiriw hám olardı qorǵaw, qarakólshilik, teri hám jún sanaatı tarawların bunnan bılay da rawajlandırıw boyınsha respublikalıq komissiyanıń qararına tiykarlanıp Qaraqalpaqstan, Buxara, Jizzaq, Qashqadárya, Nawayı, Samarqand hám Surxandárya jaylaw xojalıqları balansındaǵı jerler Mongoliyadan qoy-eshkilerdi Ózbekstanǵa keminde 1 000 bas import etken isbilermenlik subektlerine tómendegi shártler tiykarında tikkeley ijaraǵa beriletuǵını belgilensin:

(a) násilshilik hám selekciya jumısların rawajlandırıw arqalı import etilgen qoy-eshkilerdiń bas sanın kóbeytip barıw;

(b) jaylawlarda azıqlıq ósimlik túrlerinen bolǵan izen, teresken, kúyrewik, kamforosma, shogan, erkek shóp, aq (qara) seksewil egiliwin shólkemlestiriw.

III. Mongoliyaǵa miywe-ovoщ hám azıq-awqat ónimlerin eksport etiw jumısların shólkemlestiriw.

Ósimlikler karantini hám onı qorǵaw agentligi Investiciyalar, sanaat hám sawda ministrligi, Sawda-sanaat palatası menen birgelikte 2025-2026-jıllarda:

(a) Mongoliyadaǵı iri sawda oraylarında “Ózbekstan ónimleri” yarmarkasın shólkemlestirsin hám awıl xojalıǵı ónimlerin Ózbekstannan eksport etip, keleshekte basqa mámleketlerge reeksporttı ámelge asırsın;

(b) Ulan-Bator qalasındaǵı iri sawda maydanlarında Ózbekstan ónimleri stendin shólkemlestirip barsın;

(v) Ózbekstan-Mongoliya sawda úyin shólkemlestirsin;

(g) Mongoliya importyor kárxanaları wákillerinen ibarat delegaciyanıń Ózbekstanǵa saparın shólkemlestirgen halda biznes ushırasıwlar ótkersin.

1. Jumsaq júnnen aralas jip hám gezleme islep shıǵarıwdı shólkemlestiriw.

Sawda-sanaat palatası, “Óztoqımashılıqsanaat” associaciyası hám Awıl xojalıǵı ministrliginiń tómendegi usınıslarına kelisim berilsin:

(a) 2025-jıldıń aqırına shekem Ózbekstan toqımashılıq fabrikalarında dáslepki basqıshta sınaw túrinde aralas jip hám gezleme islep shıǵarıw ushın Mongoliyadan “Ózsanaateksport” AJ arqalı oraylasqan halda jumsaq jún hám kashemir alıp keliw. Onda “Sawdanı rawajlandırıw kompaniyası” AJ usı maqsetler ushın “Ózsanaateksport” AJǵa onıń buyırtpasına tiykarlanıp belgilengen tártipte qarjı ajıratadı;

(b) 2026-jıldıń aqırına shekem Mongoliyadan import etilgen qoy-eshkilerden alınatuǵın júndi qayta islew boyınsha jergilikli qánigelerdiń Mongoliyanıń kashemir islep shıǵarıw hám toqımashılıq kárxanalarında mamanlıǵın arttırǵan halda júndi qayta islew kárxanasın shólkemlestiriw.

1. Awıl xojalıǵı ónimlerin islep shıǵarıw tarawında tájiriybe almasıw hám qánigelerdiń mamanlıǵın arttırıwdı jolǵa qoyıw.
2. Agrosanaattı rawajlandırıw agentligi 2026-jıldıń aqırına shekem Mongoliyaǵa suwıqqa shıdamlı hám zúráátli 10 mıń dana miywe nállerin tamshılatıp suwǵarıw texnologiyaları menen birge jetkerip bersin jáne 15 gektar jer maydanında zamanagóy sanaatlasqan intensiv baǵ shólkemlestiriwge járdemlessin. Onda miywe nállerin hám tamshılatıp suwǵarıw texnologiyaların satıp alıp, onı Monǵoliyaǵa jetkeriw qárejetlerin qaplaw Agrosanaattı rawajlandırıw hám qollap-quwatlaw mámleketlik maqsetli qorınıń qarjıları esabınan Agrosanaattı rawajlandırıw agentligi janındaǵı “Agrosanoat innovatorlari” JShJ tárepinen ámelge asırıladı.
3. Awıl xojalıǵı ministrligi 2026-2027-oqıw jılınan baslap Tashkent mámleketlik agrar universiteti hám Mongoliya tábiyǵıy pánler universiteti arasında magistratura qánigelikleri boyınsha birgeliktegi bilimlendiriw baǵdarlamalarınıń engiziliwin támiyinlesin.
4. Qarardıń orınlanıwın shólkemlestiriw, támiyinlew hám qadaǵalaw

Bas ministrdiń orınbasarları J.Qwchqorov hám J.Xodjaev eki ay múddette Ózbekstan hám Mongoliya arasında erisilgen kelisimler hám joybarlardı qarjılandırıw hám  isbilermenlik subektlerin aylanıs qarjılar menen támiyinlew maqsetinde Sanaattı rawajlandırıw qorına 50 million AQSh dolları hám Sawdaǵa kómeklesiw qorına 50 million AQSh dolları ekvivalentinde 2030-jıl 31-dekabrge shekem qaytarıw shárti menen tómen procentli qarjı tartıw boyınsha Ózbekstan Respublikası Prezidenti Administraciyasına usınıs kirgizsin.

Ministrler Kabineti (Xodjaev) eki hápte múddette usı qarardıń 2 hám 4-bántlerine muwapıq tómendegilerdi tastıyıqlasın:

(a) hawa transportında tasıw qárejetleriniń 50 procentin Mámleketlik byudjet esabınan kompensaciyalaw boyınsha waqıtsha tártipti;

(b) Veterinariya xızmeti hám sharwashılıqtı rawajlandırıw qorı qarjıları esabınan isbilermenlik subektlerine Mongoliyadan qoy-eshkilerdi alıp keliw ushın finanslıq járdem beriw boyınsha waqıtsha tártipti.

15. Transport ministrligi on kún múddette:

(a) Veterinariya komiteti menen birgelikte qoy-eshkilerdi Mongoliyadan Ózbekstanǵa hawa transportı arqalı alıp keliw;

(b) Ósimlikler karantini hám onı qorǵaw agentligi menen birgelikte awıl xojalıǵı ónimlerin Ózbekstannan Mongoliyaǵa hawa transportı arqalı eksport etiwdi shólkemlestiriw ilajların kórsin.

Veterinariya komiteti bir hápte múddette Mongoliyadan import etiletuǵın qoy-eshkilerdiń  násil, salmaǵı hám jası boyınsha talaplardı islep shıǵıp, aymaqlar hám isbilermenlerge jetkersin.

2025-2026-jıllarda Ózbekstan hám Mongoliya arasında awıl xojalıǵı tarawında ámelge asırılatuǵın ilajlar boyınsha “jol kartası” 2-qosımshaǵa muwapıq tastıyıqlansın.

Usı qarardıń orınlanıwın nátiyjeli shólkemlestiriwge juwapker hám jeke juwapker etip tómendegiler belgilensin:

(a) awıl xojalıǵı ministri I. Abdurahmonov – Mongoliyada ovoщ hám palız eginlerin jetistiriw jáne agrar tarawda ilimiy birge islesiwdi nátiyjeli jolǵa qoyıwǵa;

(b) awıl xojalıǵı ministri I.Abdurahmonov hám Veterinariya komitetiniń baslıǵı B.Norqobilov – Mongoliyadan Ózbekstanǵa import etiletuǵın qoy-eshkilerdi alıp keliw hawa transportı qárejetiniń bir bólegin qaplap beriwge;

(v) Veterinariya komitetiniń baslıǵı B.Norqobilov:

(i) Mongoliyadan qoy-eshkilerdi Ózbekstanǵa import etiw hám násilshilik hám selekciya jumısların rawajlandırıw arqalı olardıń sanın jergilikli sharayatqa beyimlestirgen halda 2029-jıldıń aqırına shekem 1 mln basqa jetkeriw;

(ii) Mongoliyadan alıp kelinetuǵın qoy-eshkilerdi jergilikli sharayatqa beyimlestiriw, olardı kóbeytiw boyınsha ilajlardıń nátiyjeliligi, berilgen jeńilliklerdiń nátiyjeliligi boyınsha hár aydıń juwmaǵı menen Ózbekstan Respublikası Prezidenti Administraciyasına esabat kirgizip barıwǵa;

(g) Ósimlikler karantini hám onı qorǵaw agentliginiń direktorı I.Ergashev – Mongoliyaǵa miywe-ovoщ hám azıq-awqat ónimleriniń eksport kólemin keskin arttırıwǵa;

(d) Sawda-sanaat palatasınıń baslıǵı D.Vahobov – Mongoliyadan Ózbekstanǵa import etiletuǵın qoy-eshkilerdiń júnin qayta islewge.

Qarardıń orınlanıwı ushın juwapker ministrlikler hám uyımlardıń jumısın muwapıqlastırıw jáne qadaǵalaw Bas ministrdiń orınbasarı J.A.Xodjaevqa júklensin.

 

Ózbekstan Respublikası Prezidenti

Sh.Mirziyoev