Ózbekstan Milliy málimleme agentligi (ÓzA) hám Belarus telegraf agentligi (BelTA) arasında birge islesiwdi keńeytiw hám jańalıqlar almasıw jedelligin arttırıwǵa qaratılǵan Málimleme almasıw haqqındaǵı memorandumǵa qol qoyıldı.

Tárepler ishki hám xalıqaralıq kún tártibindegi tiykarǵı waqıyalar haqqında turaqlı túrde isenimli málimleme almasıwǵa kelisip aldı. Bul processte mámleket basshıları, rásmiy delegaciyalardıń sapar etiwi, sonday-aq, hár eki mámlekette ótkeriletuǵın iri ilajlardı málimleme jaǵınan qollap-quwatlawǵa ayrıqsha itibar qaratıladı.

Memorandum kásiplik rawajlanıw baǵdarlamaları – aldıńǵı tájiriybeni úyreniw hám mamanlıq arttırıw óz-ara ámeliyatın da názerde tutadı. Atap ótilgenindey, bunday almasıw kadrlar potencialın bekkemleydi, waqıyanı sáwlelendiriwde anıqlıq hám operativlik boyınsha birden-bir standarttı islep shıǵıwǵa járdemlesedi.

ÓzAnıń Bas direktorı Abdusaid Qwchimov hám BelTA Bas direktorı Irina Akulovich tárepinen onlayn qol qoyılǵan kelisim eki mámlekettiń jetekshi málimleme agentlikleri sherikligin tereńlestiriw jolında qoyılǵan jáne bir qádem sıpatında, ulıwma, Ózbekstan – Belarus birge islesiwi joqarı ósiw pátin bildiredi.

Bul hújjettegi qaǵıydalardıń ámelge asırılıwı óz-ara isenimdi jáne de bekkemlep, málimleme almasıw kólemin keńeytiw, region hám dúnyadaǵı waqıyalardı qalıs, teń salmaqlı sáwlelendiriwge xızmet etetuǵını sózsiz.

Abduaziz XIDIROV, ÓzA