Mámleketimiz basshısı Tashkent hám Jańa Tashkent qalası ushın “Sheshimler atlası” prezentaciyası menen tanıstı.

Mámleketimizdiń ekonomikalıq rawajlanıwı paytaxtımızdıń kelbetinde ayqın kórinedi. Barlıq rayonlar hám qala átirapında qurılıs páti jedel. Keyingi jıllarda Jańa Tashkent qurılısı da baslanıp, bir pútin megapoliske aylanbaqta.

Aymaqtı turaqlı rawajlandırıw maqsetinde Tashkent qalasınıń 2045-jılǵa shekemgi dáwirge mólsherlengen bas rejesi qabıl etildi. Onda qalanıń qurılıs rejeleri, injenerlik hám jol-transport infrastrukturası, qorǵaw aymaqları boyınsha tiykarǵı “Sheshimler atlası” usı bas rejeniń logikalıq dawamı bolıp, onda qalanıń sırtqı kórinisi, kósheler ortalıǵı boyınsha ulıwma talaplar atap ótilgen. Bul katalog-maǵlıwmatnama qurılmalardı joybarlaw, ornatıw hám olardan paydalanıw qagıydaların qamtıp algan bes kitaptan ibarat. Hár bir bólimde jámiyetlik orınlardı shólkemlestiriw hám abadanlastırıw, imaratlardıń sırtqı bólegin birden-bir arxitekturalıq kóriniske keltiriw boyınsha usınıslar berilgen.

Máselen, házirgi standart boyınsha jollardı qurıw hám ońlaw qatnaw bóleginiń “qızıl sızıǵı”na shekem orınlanadı. Rawajlanǵan qalalar tájiriybesinde bul kósheniń eki tárepindegi imarattan imaratqa shekem principinde ámelge asırıladı. Sonda aralıqta qarawsız jer qalmaydı, jol boyı tutas hám sáykes abadanlastırıladı.

Atlas qala ortalıǵın joybarlastırıwda turaqlı rawajlanıw maqsetlerin hám milliy koloritti engiziwge xızmet etedi. Úylesimli hám ekologiyalıq taza orınlardı jaratıwǵa járdemlesip, xalıqtıń turmıs sapasın jaqsılaydı. Ashıq jámiyetlik orınlardı rawajlandırıw boyınsha jańa joybarlarda qátelerge jol qoymaw imkaniyatın beredi.

Prezentaciyada bul talaplardıń mazmun-mánisi hám onnan kelip shıǵatuǵın wazıypalar kórip shıǵıldı. Qalanıń ózine tánligin saqlaǵan halda kelbetin jáne de jaqsılaw, jol boyların abadanlastırıw, turmıs mádeniyatın arttırıw boyınsha kórsetpeler berildi.

ÓzA