Prezident Shavkat Mirziyoev Olimpiada hám Paralimpiada oyınlarına tayarlıq boyınsha usınıslardıń prezentaciyası menen tanıstı.

Bizge belgili, 2024-jılı Parijde bolıp ótken Olimpiada hám Paralimpiada oyınlarında elimiz sportshıları tabıslı qatnasıp, ulıwma komandalıq esapta hár eki baǵdarda 13-orındı iyelegen edi. Usı jılı 13-fevralda bolıp ótken videoselektor májilisinde elimizde olimpiada háreketin bunnan bılay da rawajlandırıw, bolajaq jarıslarǵa puqta tayarlıq kóriw wazıypası qoyılǵan edi. Soǵan muwapıq, 2028-jılı AQShtıń Los-Andjeles qalasında bolatuǵın XXXIV  jazǵı Olimpiada hám XVIII Paralimpiya oyınlarına tayarlıq boyınsha qarar joybarı islep shıǵıldı.

Qarar menen 10 tiykarǵı wazıypa belgilenbekte. Bular – sport túrlerin tiykarǵı, perspektivalı hám rawajlanıp atırǵan kategoriyalarǵa ajıratqan halda kúsheytiw, nátiyjeli sport túrleriniń geografiyasın keńeytiw, qábiletli jaslardı tómengi buwınnan baslap ashıq-aydın usılda tańlap alıw, sırt ellerdiń tájiriybesine tiykarlanǵan milliy metodika jaratıw, saylandı komandalar ushın anıq maqset hám nátiyjelilikke baǵdarlanǵan oqıw-shınıǵıw jıyınların shólkemlestiriw, olardıń materiallıq-texnikalıq bazasın jaqsılaw, xalıqaralıq sport shólkemleri menen birge islesiwdi bekkemlew sıyaqlılar bolıp esaplanadı.

Sonday-aq, Ózbekstan sportshıların 2028-jılǵı Olimpiada hám Paralimpiada oyınlarına tayarlaw baǵdarlaması hám maqsetli kórsetkishler belgilenbekte.

Bul tarawdaǵı jumıslardı sistemalı shólkemlestiriw maqsetinde Milliy olimpiada komitetiniń 14 aymaqlıq bólimi shólkemlestirildi. Qaraqalpaqstan Respublikası Joqarǵı Keńesiniń Baslıǵı, wálayatlar hám Tashkent qalası hákimleri Olimpiada háreketin rawajlandırıw boyınsha Ózbekstan Respublikası Prezidentiniń arnawlı wákili boladı. Hár bir aymaqqa Sport ministrligi hám Olimpiada komitetinen juwapkerler biriktiriledi.

Tiykarǵı maqset tek ǵana Olimpiada emes, turaqlı hám bekkem tiykar jaratıw bolıp tabıladı. Qábiletli sportshılardı eń tómengi buwınnan baslap saylap alıw hám professional etip tayarlaw ushın úsh basqıshlı «Jańa Ózbekstan Olimpiada shoqqıları» jarısı jolǵa qoyıladı. Onıń final basqıshı hár jılı Olimpiya qalashasında «Prezident olimpiadası» sıpatında ótkeriledi. Jeńimpaz hám sıylı orın iyeleri Olimpiada oraylarına tartılıp, professional tayarlanadı.

Respublikalıq olimpiada hám paralimpiada orayınıń jumısı milliy saylandı komandalar rezervin jaratıwǵa qaratıladı. Onıń támiynatı 2026-jıldan baslap respublika byudjetine ótkeriledi. Oray 8-11-klasslar ushın mektep, 1-2-kurslar ushın kolledj sıpatında jumıs alıp baradı hám qabıllaw kvotası arttırıladı. 1-2-kurs oqıwshılarına Sport ministrligi stipendiyası beriledi. Oqıw-shınıǵıwlardı ótkerip barıw ushın Olimpiada qalashası imaratları orayǵa biyǵárez tiykarda biriktiriledi.

Sonday-aq, atletler rezervin keńeytiw maqsetinde jeke menshik sport klublarınıń jumısı jetilistirilip, rásmiy jarıslarda qatnasıwı támiyinlenedi. Joqarı nátiyje kórsetken sportshılar milliy saylandı komandalarǵa qabıl etiliwi múmkin boladı.

Sportshı hám trenerler ushın kóplegen xoshametler de názerde tutılmaqta. Sonıń ishinde, abıraylı jarıslardıń jeńimpazları hám sıylı orın iyeleri joqarı áskeriy bilimlendiriw mákemelerine tikkeley qabıl etiledi. Sheber sportshılardı baslanǵısh buwında jetistirgen trenerler ushın da ústemeniń belgili bir bólegi tólep barıladı.

Mámleketimiz basshısı sport federaciyalarınıń jumısın nátiyjeli shólkemlestiriw, aymaqlarda taraw infrastrukturasın jaqsılaw, sportshı hám trenerlerdi hár tárepleme qollap-quwatlaw boyınsha kórsetpeler berdi.

ÓzA