Nókis Olimpiya hám paralimpiya sport túrlerine tayarlaw orayında «30-iyun-Jaslar kúni» múnásibeti menen «Áhmiyetli 90 kún» joybarı sheńberinde Tashkent qalasında ótkerilgen «Bes baslama paralimpiadası» sport jarıslarınıń Ózbekstan Respublikası basqıshında jeńimpaz bolǵan parasportshılar menen ushırasıw keshesi bolıp ótti.

Ilajǵa Qaraqalpaqstan Respublikası Sport ministrliginiń juwapker basshıları, Nókis Olimpiya hám paralimpiya sport túrlerine tayarlaw orayı trener-oqıtıwshıları hám oqıwshıları, ǵalaba xabar qurallarınıń wákilleri qatnastı.
Onda Qaraqalpaqstan Respublikası Sport ministrliginiń bólim baslıǵı Ikram Qudiyarov hám basqalar shıǵıp sóylep, ilaj qatnasıwshıların «30-iyun-Jaslar kúni» bayramı, jeńimpazlardı qolǵa kirgizgen tabısları menen qızǵın qutlıqladı hám olardıń aldaǵı jarıslarda úlken tabıslarǵa erise beriwine tilekleslik bildirdi.
Ilajda Tashkent qalasında ótkerilgen «Bes baslama paralimpiadası» sport jarıslarınıń Ózbekstan Respublikası basqıshında jeńimpaz bolǵan Periyzat Arzımova, Jarqınay Murtazaeva, Muqaddes Qalbaeva hám Timur Allamuratovlar ózleriniń parasportqa kirip keliwi hám jeńiske erisiwge shekemgi basıp ótken mashaqatlı jolları, úyretken trenerleri haqqında keń túrde aytıp ótip, usınday imkaniyatlardı jaratıp bergeni ushın elimiz basshılarına ózleriniń tereń minnetdarshılıǵın bildirdi.
-Parabadminton sportı menen eki jıldan berli, trenerim Joldasbay Úbbiniyazovtıń basshılıǵında shuǵıllanıp kelmektemen,-deydi «Bes baslama paralimpiadası» sport jarısınıń gúmis medal iyesi Muqaddes Qalbaeva.-Jarıs oǵada qızıqlı hám keskin bellesiwlerge tolı boldı. CHempionlıq ushın gúresken edim. Biraq, áwmet qarsılasıma kúlip baqtı. Aldaǵı waqıtları shınıǵıwlarǵa ele de kúsh salıp, birinshi orındı iyelewge háreket etemen.
Sonday-aq, ushırasıwda respublikamızda sport tarawında júrgizilip atırǵan keń kólemdegi reformalar hám jańalanıwlar, respublikamız sportshılarınıń erisip atırǵan jetiskenliklerin keń jámiyetshilikke tanıstırıwǵa ózleriniń salmaqlı úleslerin qosıp kiyatırǵan bir qatar jurnalistlerge Qaraqalpaqstan Respublikası Sport ministrliginiń Minnetdarshılıq xatı hám estelik sawǵaları tapsırıldı.
Óz gezeginde jurnalistler de ózlerine kórsetilip atırǵan joqarı húrmet hám itibar ushın shólkemlestiriwshilerge tereń minnetdarshılıqların bildirdi.

Adilbay Orazov,
Qaraqalpaqstan xabar agentligi sholıwshısı